លោកប្រធានាធិបតី Volodymyr Zelenskiy កាលពីថ្ងៃអង្គារ (១០ ធ្នូ) បានជំរុញឱ្យសម្ព័ន្ធមិត្តរបស់អ៊ុយក្រែន ផ្តល់ប្រព័ន្ធការពារដែនអាកាសប៉ាទ្រីយ៉ូត (Patriot) ចំនួន ១០ ទៅ ១២គ្រឿង បន្ថែមទៀត ក្នុងអ្វីដែលលោកនិយាយថា នឹងការពារដែនអាកាសរបស់ខ្លួនយ៉ាងពេញលេញ បន្ទាប់ពីមីស៊ីលរបស់រុស្ស៊ី បានសម្លាប់មនុស្សយ៉ាងតិច ៤នាក់នៅភាគអាគ្នេយ៍នៃទីក្រុង ហ្សាប៉ូរីសៀ (Zaporizhzhia)។

ចាប់តាំងពីការវាយលុកពេញលក្ខណៈរបស់រុស្ស៊ី ក្នុងខែកុម្ភៈ ឆ្នាំ២០២២មក អ៊ុយក្រែនបានស្នើឱ្យសម្ព័ន្ធមិត្តរបស់ខ្លួនផ្គត់ផ្គង់ប្រព័ន្ធការពារដែនអាកាសទំនើបៗបន្ថែមទៀតដើម្បីទប់ទល់ការវាយប្រហារឥតឈប់ឈរ។ ថ្លែងនៅក្នុងទីក្រុងគីវ លោក Zelenskiy បានបង្ហាញពីការខកចិត្តរបស់ខ្លួនជុំវិញជំនួយដ៏យឺតយ៉ាវពីសម្ព័ន្ធមិត្តលោកខាងលិច។

លោកបាននិយាយ បន្ទាប់ពីជួបជាមួយមន្ត្រីសភាអឺរ៉ុបថា "ប្រព័ន្ធប៉ាទ្រីយ៉ូត ប្រហែល ១០ ទៅ ១២គ្រឿងបន្ថែមសម្រាប់អ៊ុយក្រែន នឹងអាចធានាអាយុជីវិតប្រជាជន ហើយនិងធ្វើឱ្យសង្រ្គាមរបស់លោកប្រធានាធិបតីរុស្ស៊ី Vladimir Putin ប្រែជាគ្មានន័យ"។

លោក Zelenskiy បានអំពាវនាវឱ្យសម្ព័ន្ធមិត្តប្រើប្រាស់ទ្រព្យបង្កករបស់រុស្ស៊ី ដើម្បីចំណាយលើប្រព័ន្ធប៉ាទ្រីយ៉ូតបន្ថែម ខណៈអ៊ុយក្រែន ត្រៀមទប់ទល់ការវាយប្រហាររដូវរងាមួយផ្សេងទៀតរបស់រុស្ស៊ី លើប្រព័ន្ធថាមពលដែលរងការខូចខាតរបស់ខ្លួន។ លោក Zelenskiy បានធ្វើការអត្ថាធិប្បាយនេះ ប៉ុន្មានម៉ោងប៉ុណ្ណោះបន្ទាប់ពីការវាយប្រហារដោយមីស៊ីលរបស់ទីក្រុងមូស្គូ បានសម្លាប់មនុស្ស ៤នាក់នៅក្រុង Zaporizhzhia ដោយបំផ្លាញគ្លីនិកឯកជនមួយកន្លែង និងធ្វើឱ្យមនុស្សរាប់សិបនាក់ទៀតរងរបួស រួមទាំងកុមារផងដែរ៕