សហរដ្ឋអាមេរិក កាលពីថ្ងៃអង្គារ (ទី១០ ខែធ្នូ) បានប្រកាសថា ខ្លួនបានផ្តល់ប្រាក់កម្ចីចំនួន ២០ពាន់លានដុល្លារដល់អ៊ុយក្រែនដែលបានពីការប្រាក់ទ្រព្យសម្បត្តិរុស្ស៊ីដែលត្រូវបានបង្កក ជាផ្នែកនៃកញ្ចប់ជំនួយរបស់ក្រុមប្រទេសមានឧស្សាហកម្មលូតលាស់ជាងគេទាំង៧ (G7) ចំនួន ៥០ពាន់លានដុល្លារ។

ក្នុងសេចក្តីថ្លែងការណ៍ដែលប្រកាសពីការសម្រេចនេះ រដ្ឋមន្ត្រីក្រសួងរតនាគារអាមេរិក លោកស្រី Janet Yellen បានឲ្យដឹងថា៖ «មូលនិធិទាំងនេះ ពោលគឺជាថវិការបានពីប្រាក់ការរបស់ទ្រព្យសម្បត្តិរុស្ស៊ីដែលត្រូវបានផ្អឹបទុក នឹងផ្តល់ឲ្យអ៊ុយក្រែននូវការគាំទ្រដ៏សំខាន់មួយ ខណៈដែលប្រទេសនេះការពារខ្លួនប្រឆាំងនឹងសង្រ្គាមលុកលុយដ៏គ្មានហេតុផល»។

ក្រសួងរតនាគារបានឲ្យដឹងថា ការផ្តល់ប្រាក់ចំណេញនេះ គឺជាសម្រេចបានតាមការប្តេជ្ញាចិត្ត ក្នុងខែតុលារបស់ខ្លួន ក្នុងការតាមទាន់ការផ្ដល់ប្រាក់កម្ចីរបស់សហភាពអឺរ៉ុបចំនួន ២០ពាន់លានដុល្លារដល់ប្រទេសអ៊ុយក្រែន ក្នុងនោះរួមជាមួយនឹងប្រាក់កម្ចីពីសម្ព័ន្ធមិត្តនៃក្រុមប្រទេស G7 គឺអង់គ្លេស កាណាដា និងជប៉ុន ដើម្បីជួយប្រទេសអឺរ៉ុបខាងកើតទប់ទល់នឹងការលុកលុយរបស់រុស្ស៊ី។

ការផ្តល់ប្រាក់កម្ចី នៅមុនការចូលកាន់តំណែងរបស់ប្រធានាធិបតីជាប់ឆ្នោត លោក Donald Trump ក្នុងខែមករា គឺមានគោលបំណងការពារមូលនិធិកុំឲ្យមានការច្រានចោលពីរដ្ឋបាលរបស់លោក។ លោក Trump បានសម្ដែងការមិនពេញចិត្តថា សហរដ្ឋអាមេរិកកំពុងផ្តល់ជំនួយច្រើនពេកដល់អ៊ុយក្រែន ហើយបាននិយាយថា លោកនឹងបញ្ចប់សង្គ្រាមយ៉ាងឆាប់រហ័ស តែមិនបានបញ្ជាក់ពីវិធីត្រូវអនុវត្តនោះឡើយ៕