​បាល់ទាត់៖ ​ទីបំផុត​អ្នក​ចាត់​ក្រុម Barcelona លោក Ronald Koeman ត្រូវបាន​បណ្តេញ​ចេញពី​តំណែង​ហើយ​ក្រោយ​ដឹកនាំ​អស់​រយៈពេល ១៤ខែ និង​បន្ទាប់ពី​ចាញ់​នៅ​ទឹកដី Rayo Vallecano ១-០ យប់មិញ​ក្របខណ្ឌ​អេ​ស្ប៉ា​ញ La Liga​។ ​​Barcelona រដូវ​កាល​នេះ​រក​បានតែ ១៥ពិន្ទុ​ក្រោយ​លេង​បាន ១០ប្រកួត​ឈរ​លេខ៩ ក្នុង​តារាង​នៅ La Liga និង​ចាញ់​ប្រកួត​ក្នុងចំណោម ៣ នៅ​វគ្គ​វិលជុំ​ក្នុង​ពូ​ល UEFA Champions League ថែមទៀត​។

​​បរាជ័យ​យប់មិញ​ជា​បរាជ័យ ៣លើក​ក្នុងចំណោម ៤ប្រកួត​ចុងក្រោយ​បូករួម​ទាំង​ចាញ់ Real Madrid ២-១ ក្នុងជំនួប El Clasico ចុង​សប្តាហ៍​កន្លងទៅ​។ ​​អតីត​អ្នកចាត់ការ​ក្រុម​ជំរើសជាតិ​ហូ​ឡង់ និង Everton វ័យ ៥៨ឆ្នាំ​រូបនេះ​បាន​ដឹកនាំ​ក្រុម​ឈ្នះ​ជើងឯក Copa del Rey ក្នុង​រដូវ​កាល​ដំបូង​របស់លោក​តែ Barcelona បាន​ត្រឹម​លេខ៣ នៅ La Liga តាម​ពីក្រោយ Real Madrid និង Atletico Madrid និង​មាន​ពិន្ទុ​ទាប​បំផុត​រាប់​ពី​ឆ្នាំ២០០៨​។​ ​​ការដឹកនាំ​ក្រុម​មិន​បានល្អ​របស់លោក Koeman ក៏​ស្រប​ពេលដែល Barcelona ជួបនឹង​វិបត្តិ​ហិរញ្ញវត្ថុ​ធ្ងន់ធ្ងរ​ផងដែរ បូករួម​ទាំង​ការចាកចេញ​របស់ Lionel Messi ទៅកាន់ Paris Saint Germain ផងដែរ​។​

​​ណាមួយ​ទៀត Barcelona គ្មាន​លទ្ធភាព​ចំណាយលុយ​ទិញ​កីឡាករ​បន្ថែម​ឡើយ​ មានតែ​យក​កីឡាករ​ដែល​ផុត​កុងត្រា​ដូចជា Memphis Depay, Sergio Aguero និង Eric Garcia ក៏ដូចជា​ខ្ចី​ជើង Luuk de Jong ពី Sevilla​។ ​​គេ​មិនទាន់​ដឹងថា​ នរណា​ជា​បេក្ខភាព​ជំនួស​តំណែង​លោក Ronald Koeman ឡើយ​តែ​អតីត​ខ្សែបម្រើ Xavi Hernandez ដែល​បច្ចុប្បន្ន​ដឹកនាំ​ក្លិប​កាតា Al Sadd គឺជា​បេក្ខភាព​ឈានមុខ​គេ​ម្នាក់​៕

​អត្ថបទ​៖​នាង សុភា​វុ​ធ