ជនភៀសខ្លួនស៊ីរី នៅអឺរ៉ុប ជាច្រើនមានក្ដីរីករាយយ៉ាងខ្លាំងនៅពេលដឹងព័ត៌មាននៃការទម្លាក់ប្រធានាធិបតីស៊ីរី លោក Bashar al-Assad ប៉ុន្តែការរំពឹងទុកនៃការត្រលប់មកទៅប្រទេសកំណើតវិញធ្វើអោយពួកគេភ័យខ្លាច។

ឥឡូវនេះ នៅពេលបណ្តាប្រទេសនៅអឺរ៉ុបគិតឡើងវិញនូវគោលនយោបាយសិទ្ធិជ្រកកោនរបស់ខ្លួនសម្រាប់ពលរដ្ឋស៊ីរី មនុស្សជាច្រើនបារម្ភថាពួកគេអាចនឹងត្រូវបង្ខំឱ្យត្រឡប់ទៅប្រទេសដែលរួមរឹតដោយវិបត្តិវិញ ខណៈក្រុមគ្រួសារជាច្រើនស្ទាក់ស្ទើរក្នុងការចាកចេញពីសន្តិសុខដ៏កក់ក្ដៅនៅអឺរ៉ុប។

ទិន្នន័យរបស់សហភាពអឺរ៉ុបបង្ហាញថា ការស្នើសុំសិទ្ធិជ្រកកោនជាលើកដំបូងដោយជនជាតិស៊ីរី ទៅកាន់អឺរ៉ុប គឺខ្ពស់បំផុតនៅក្នុងឆ្នាំ២០១៥ និង២០១៦ ពោលគឺច្រើនជាង ៣៣០.០០០នាក់ ក្នុងឆ្នាំនីមួយៗ មុនពេលធ្លាក់ចុះយ៉ាងខ្លាំងក្នុងពេលបីឆ្នាំបន្ទាប់។ ប៉ុន្តែសំណើសិទ្ធិជ្រកកោននោះបានកើនឡើងវិញនៅចន្លោះឆ្នាំ២០២០ និង២០២៣ បន្ទាប់ពីការរញ្ជួយដីដ៏មហន្តរាយ និងអំពើហិង្សា ព្រមទាំងការលំបាកផ្នែកសេដ្ឋកិច្ច ។

ពាក្យស្នើសុំរាប់ពាន់ច្បាប់នោះ ឥឡូវនេះត្រូវបានផ្អាក បន្ទាប់ពីបណ្តាប្រទេសអឺរ៉ុបមួយចំនួន រួមទាំងក្រិកនៅសប្តាហ៍នេះ បានផ្អាកការស្នើសុំសិទ្ធិជ្រកកោនពីប្រជាជនស៊ីរី ខណៈពួកគេកំពុងពិចារណាថា តើស៊ីរី មានសុវត្ថិភាពវិញហើយមែនទេ ក្រោយរបបលោក Assad ដួលរលំ។ គេក៏មិនច្បាស់ដែរថា តើអ្នកស្វែងរកសិទ្ធិជ្រកកោនទាំងនោះនឹងត្រូវបង្ខំឱ្យទៅវិញឬយ៉ាងណា៕