​បាល់ទាត់៖ ​ក្រុម​សេះបង្កង់ Juventus បាន​ស្គាល់​បរាជ័យ​លើក​ទី៣ នៅ Serie A រដូវ​កាល​នេះ​ក្រោយ​ចាញ់ Sassuolo ២-១ ក្នុង​ទឹកដី​ខ្លួនឯង​យប់​ថ្ងៃ​ពុធ​ម្សិលមិញ​។ ​Davide Frattesi បើក​ការនាំ​មុខមុន​ឱ្យ Sassuolo នៅ​នាទី​ទី៤៤ ចុង​វគ្គ​ទី១ មុនពេល​ដែល Weston McKennie តែ​ត​បញ្ចូល​ទី​តាម​ស្មើ​វិញ​នៅ​នាទី​ទី៧៦ ពី​បាល់ Freekick របស់ Paulo Dybala​។

​​យ៉ាងណាក្តី​ក្រុម​របស់លោក Massimiliano Allegri មិនអាច​ធ្វើ​អ្វី​ក្រុម​ភ្ញៀវ​បានឡើយ​នៅពេលវេលា​ដែល​នៅសល់ និងផ្ទុយទៅវិញ​ក៏​ភ្លាត់​ចុង​ម៉ោង​នាទី​ទី៩០+៥ ទៅហើយ Maxime Lopez គឺជា​អ្នក​ស៊ុត​គ្រាប់​ជ័យជំនះ​ឱ្យ Sassuolo នៅ​ទីបញ្ចប់​។ ​បរាជ័យ​នេះ​ធ្វើឱ្យ Juventus នៅពេលនេះ​ធ្លាក់​ដល់​លេខ៧ ដេញ​ពីក្រោយ​ក្រុម​កំពូល​តារាង AC Milan ដល់​ទៅ ១៣ពិន្ទុ​ ខណៈ Sassuolo ឡើងមក​លេខ៩ ដេញ​ពីក្រោយ Juventus ១ពិន្ទុ​។ នេះ​ជា​ជ័យជំនះ​ដំបូង​របស់ Sassuolo នៅលើ​ទឹកដី Juventus ក្នុងចំណោម​ការប៉ុនប៉ង ៩លើក​។​

ជា​លើក​ទី២ ផងដែរ​សំរាប់ Juventus តាំងពី​ឆ្នាំ១៩៩៦ ដែល​ចាញ់ ៣ប្រកួត​ក្នុងចំណោម ១០ប្រកួត​ដំបូង​នៃ​រដូវ​កាល​។​ ​​លទ្ធផល​ផ្សេងទៀត Inter Milan ឈ្នះ​នៅ​ទឹកដី Empoli ២-០ បន្ត​ឈរ​លេខ៣ ដេញ​ពីក្រោយ AC Milan ៨ពិន្ទុ ​ខណៈ Roma ក៏​យកឈ្នះ​នៅ​ទឹកដី Cagliari ២-១ បន្ត​ឈរ​លេខ៤ មាន ១៩ពិន្ទុ​ដេញ​ពីក្រោយ AC Milan ៩ពិន្ទុ​។ ​ក្រុម​លេខ២ គឺ Napoli ដេញ​ពីក្រោយ AC Milan ៣ពិន្ទុ​តែ​មិនទាន់​ប្រកួត​ឡើយ​ពោលគឺ​ជួប Bologna យប់​នេះ​៕

​អត្ថបទ​៖​នាង សុភា​វុ​ធ