សេចក្តីថ្លែងការណ៍មួយ ដែលត្រូវបានចេញ នៅថ្ងៃព្រហស្បតិ៍ (ទី១២ ខែធ្នូ) នេះ បានឲ្យដឹងថា បណ្ដាមេដឹកនាំនៃក្រុមប្រទេសប្រជាធិបតេយ្យធំៗទាំងប្រាំ៧ (G7) «ត្រៀមខ្លួនរួចជាស្រេច ដើម្បីគាំទ្រដល់ដំណើរការអន្តរកាល ដែលនាំទៅរកអភិបាលកិច្ចអាចទុកចិត្តបាន បរិយាបន្ន និងមិនបែងចែកនិកាយ» នៅក្នុងប្រទេសស៊ីរី។

G7 បានលើកឡើងថា បន្ទាប់ពីការបញ្ចប់ការគ្រប់គ្រងរយៈពេល ២៤ឆ្នាំរបស់លោក Bashar al-Assad សម័យអន្តរកាលនយោបាយ ត្រូវតែធានាបាននូវ «ការគោរព ចំពោះនីតិរដ្ឋ សិទ្ធិមនុស្សជាសកល ក្នុងនោះរួមទាំងសិទ្ធិស្ត្រីផងដែរ ការការពារប្រជាជនស៊ីរីទាំងអស់ ក្នុងនោះរួមទាំងសាសនា និងជនជាតិភាគតិច តម្លាភាព និងគណនេយ្យភាព»។

សេចក្តីថ្លែងការណ៍នោះ បានបន្ថែមថា៖ «ក្រុមប្រទេស G7 នឹងធ្វើការជាមួយ និងគាំទ្រយ៉ាងពេញទំហឹង ចំពោះរដ្ឋាភិបាលស៊ីរី នាពេលអនាគត ដែលគោរពតាមស្តង់ដារទាំងនោះ និងជាលទ្ធផលពីដំណើរការនោះ»។

ជាមួយគ្នានេះ មេដឹកនាំទាំងអស់ ក៏បានអំពាវនាវផងដែរដល់ «គ្រប់ភាគី» ឲ្យ «រក្សាបូរណភាពទឹកដី និងឯកភាពជាតិរបស់ប្រទេសស៊ីរី ព្រមទាំងគោរពឯករាជ្យភាព និងអធិបតេយ្យភាពរបស់ប្រទេសនេះ»៕