សហរដ្ឋអាមេរិក កាលពីថ្ងៃព្រហស្បតិ៍ (១២ ធ្នូ) បានផ្តល់រង្វាន់ចំនួន ៥លានដុល្លារ សម្រាប់ព័ត៌មានអំពីគ្រោងការណ៍ចោទប្រកាន់មួយ ដែលថាបុគ្គលិកបច្ចេកវិទ្យាកូរ៉េខាងជើង ទទួលបានការងារនៅក្រុមហ៊ុនអាមេរិកដោយមិនមានការសង្ស័យអ្វីឡើយ បន្ទាប់មកបានលួចការណ៍សម្ងាត់ពាណិជ្ជកម្មដើម្បីគំរាមទារប្រាក់ ហើយប្រាក់ទាំងនោះប្រើសម្រាប់ផ្តល់មូលនិធិដល់កម្មវិធីអាវុធរបស់ទីក្រុងព្យុងយ៉ាង។

ក្រសួងការបរទេសសហរដ្ឋអាមេរិក បាននិយាយថា បុគ្គលិកកូរ៉េខាងជើងប្រហែល ១៣០នាក់ បានទទួលការងារផ្នែកព័ត៌មានវិទ្យានៅក្រុមហ៊ុន និងអង្គការមិនស្វែងរកប្រាក់ចំណេញរបស់សហរដ្ឋអាមេរិក ចាប់ពីឆ្នាំ២០១៧ ដល់ឆ្នាំ២០២៣ ហើយរកចំណូលបានយ៉ាងហោចណាស់ ៨៨លានដុល្លារ ដែលទីក្រុងព្យុងយ៉ាង ប្រើប្រាស់សម្រាប់អាវុធមហាប្រល័យរបស់ខ្លួន។

អាមេរិកបាននិយាយថា មួយផ្នែកនៃប្រាក់សរុបទាំងនោះគឺជាសំណងរបស់បុគ្គលិកពីនិយោជក ដែលនៅទីបំផុតបានទៅលើរដ្ឋាភិបាលកូរ៉េខាងជើង។ ក្រុមហ៊ុនទាំងនោះមិនត្រូវបានគេស្គាល់ទេ ហើយបេសកកម្មកូរ៉េខាងជើង ប្រចាំអង្គការសហប្រជាជាតិ នៅទីក្រុងញូវយ៉ក មិនបានឆ្លើយតបភ្លាមៗចំពោះសំណើសុំការអត្ថាធិប្បាយឡើយ។

គួររម្លឹកថា បុគ្គលិកផ្នែកព័ត៌មានរបស់វិទ្យាកូរ៉េខាងជើង ដែលរត់ចោលស្រុកម្នាក់បានប្រាប់សារព័ត៌មានរ៉យទ័រ ក្នុងខែវិច្ឆិកា ឆ្នាំ២០២៣ ថាខ្លួនធ្លាប់ព្យាយាមឱ្យក្រុមហ៊ុនជួលធ្វើការ ហើយបន្ទាប់មកបង្កើតទម្រង់ប្រព័ន្ធផ្សព្វផ្សាយសង្គមក្លែងក្លាយបន្ថែមទៀត ដើម្បីទទួលបានការងារកាន់តែច្រើន៕