ក្រសួងពាណិជ្ជកម្មចិនបាននិយាយកាលពីថ្ងៃព្រហស្បតិ៍សប្ដាហ៍នេះថា ប្រទេសចិនបើកចំហរក្នុងការទំនាក់ទំនង និងប្រាស្រ័យទាក់ទងជាមួយក្រុមសេដ្ឋកិច្ច និងពាណិជ្ជកម្មថ្មីរបស់រដ្ឋបាលសហរដ្ឋអាមេរិកក្រោមការដឹកនាំរបស់លោកDoland Trump ជានិច្ច។

អ្នកនាំពាក្យ លោក ហ៊ី យ៉ាទុង (He Yadong) បានប្រាប់សន្និសីទសារព័ត៌មានមួយថា ភាគីចិនបានរក្សាទំនាក់ទំនងយ៉ាងជិតស្និទ្ធជាមួយក្រសួងពាណិជ្ជកម្មសហរដ្ឋអាមេរិក តាមរយៈយន្តការទំនាក់ទំនង និងការផ្លាស់ប្តូររវាងភាគីទាំងពីរ។

រដ្ឋបាលលោក Biden កាលពីថ្ងៃពុធសប្ដាហ៍នេះបានប្រកាសថានឹងដំឡើងពន្ធលើផលិតផលចិនមួយចំនួន រួមទាំងផ្ទាំងថាមពលព្រះអាទិត្យ និងផលិតផលលោកហៈធាតុរឹងស្រដៀងប្រាក់ តង់ស្តែន(tungsten) មួយថ្ងៃបន្ទាប់ពីប្រធានាធិបតីអាមេរិកលោក Joe Biden បានហៅវិធីសាស្រ្តពន្ធគយរបស់ប្រធានាធិបតីជាប់ឆ្នោត Donald Trump ថាជាកំហុសដ៏ធំ និងជាគ្រោះមហន្តរាយសេដ្ឋកិច្ចសម្រាប់អាមេរិក។

លោកថា ខណៈមានជំហរប្រឆាំងរហូតមកចំពោះការដំឡើងពន្ធជាឯកតោភាគី ប្រទេសចិនមានឆន្ទៈក្នុងការពង្រឹងកិច្ចសន្ទនា និងការសម្របសម្រួលជាមួយសហរដ្ឋអាមេរិក គ្រប់គ្រងការខ្វែងគំនិតគ្នាឱ្យបានត្រឹមត្រូវ និងជំរុញឱ្យមានការរីកចម្រើនប្រកបដោយស្ថិរភាព និងយូរអង្វែងក្នុងទំនាក់ទំនងសេដ្ឋកិច្ច និងពាណិជ្ជកម្មទ្វេភាគី ដោយផ្អែកលើគោលការណ៍នៃការគោរពគ្នាទៅវិញទៅមក ការរួមរស់ដោយសន្តិភាព និងកិច្ចសហប្រតិបត្តិការឈ្នះ-ឈ្នះ។

អ្នកនាំពាក្យរូបនេះបានកត់សម្គាល់ថា ប្រទេសចិនប្រឆាំងយ៉ាងម៉ឺងម៉ាត់ចំពោះសហរដ្ឋអាមេរិកដែលពង្រីកគោលគំនិតសន្តិសុខជាតិ រំលោភលើសេដ្ឋកិច្ចទីផ្សារ គោលការណ៍ប្រកួតប្រជែងដោយយុត្តិធម៌ និងការជ្រៀតជ្រែកក្នុងកិច្ចសហប្រតិបត្តិការសេដ្ឋកិច្ច និងពាណិជ្ជកម្មធម្មតារវាងចិន និងសហរដ្ឋអាមេរិក៕