កាលពីព្រឹកថ្ងៃទី១២ ខែធ្នូ ឆ្នាំ២០២៤ សម្តេចអគ្គមហាសេនាបតីតេជោ ហ៊ុន សែន ប្រធាន​ព្រឹទ្ធសភា​នៃ​ព្រះរាជាណាចក្រកម្ពុជា បានអញ្ជើញជួបពិភាក្សាជាមួយ ឯកឧត្តម Numan Kurtulmuş ប្រធានរដ្ឋសភា តួកគី នៅវិមានរដ្ឋសភា រដ្ឋធានីអង់ការ៉ា។

ជា​កិច្ចចាប់ផ្តើម ឯកឧត្តម ប្រធានសភា បានសម្តែងក្តីរីករាយ និងស្វាគមន៍យ៉ាងកក់ក្ដៅចំពោះ សម្ដេច​តេជោ និងគណៈប្រតិភូ ដែលបានអញ្ជើញមកបំពេញទស្សនកិច្ចនៅតួកគីយេ។ ឯកឧត្តម បាន​ចាត់ទុក សម្តេចតេជោ គឺជាឥស្សរជននយោបាយដ៏សំខាន់បំផុត និងស្ថាបនិក​នៃកម្ពុជា​ទំនើប​បច្ចុប្បន្ន ហើយបានគូសបញ្ជាក់ថា ទស្សនកិច្ចរបស់សម្តេចតេជោ មានសារៈសំខាន់ពិសេស ខណៈ​ពេលដែលប្រទេសកម្ពុជា និងតួកគី ប្រារព្ធខួបលើកទី៦៥ នៃទំនាក់ទំនងកាទូត។

ឯកឧត្តម បានបន្តថា សកលលោក កំពុងចូលក្នុងយុគសម័យថ្មី ដែលគេសម្គាល់ថា មាន​ការ​ផ្លាស់​ប្តូរ​លឿន និងបង្កើតតុល្យភាពថ្មី។ ក្នុងបរិបទនេះ តួកគី ផ្តល់សារៈសំខាន់ពិសេស ដល់ទ្វីបអាស៊ី ដែល​ក្នុង​នោះ មានកម្ពុជាផងដែរ។ ជាមួយគ្នានេះដែរ ឯកឧត្តមប្រធានសភា បានលើកឡើងថា តួកគី នឹងបន្តកសាងស្ពានសហប្រតិបត្តិការថ្មីៗទៀតជាមួយកម្ពុជា។ តួកគីយេបានបើកមជ្ឈមណ្ឌលវប្បធម៌នៅទីក្រុងភ្នំពេញ ហើយ ដោយសហការ​ជាមួយ​ទីភ្នាក់​ងារ​ជំនួយ​អភិវឌ្ឍន៍តួកគី (TIKA) បានចុះហត្ថលេខាខាងវិស័យអប់រំ សិក្សាធិការ។ ជាក់ស្តែង និស្សិត​​កម្ពុជា ២៥ នាក់កំពុង​សិក្សា​នៅ​តួកគី​ហើយ​សង្ឃឹម​ថា​នឹង​មាន​ច្រើន​ទៀត​នៅ​ពេល​អនាគត​។

ឯកឧត្តមបន្ថែមថា កម្ពុជាមានសក្តានុពលធំធេងខាងវិស័យពាណិជ្ជកម្ម ក៏ប៉ុន្តែ​ទំហំ​នៃ​ការ​ផ្លាស់​ប្តូរ​ពាណិជ្ជ​កម្ម​រវាងប្រទេសទាំងពីរ សម្រេចបានប្រមាណ ៣៥០ លានដុល្លារនៅឆ្នាំ២០២៤ លើ​ផែន​ការ​សម្រេចឱ្យបាន១ពាន់លានដុល្លារ។ ឯកឧត្តម បានបន្តថា ទស្សនកិច្ចរបស់ សម្តេចតេជោ នា​ពេលនេះសំខាន់ណាស់សម្រាប់កសាងទំនាក់ទំនងអន្តរសភាទ្វេភាគី និងពហុភាគី ដែល​ក្នុង​នោះ ​មានសន្និបាតអន្តរសភាអាស៊ាន (IPA) ផងដែរ។

នាឱកាស​នោះសម្តេចតេជោ បានថ្លែងអំណរគុណ ឯកឧត្តម ប្រធានសភាតួកគីយេ ចំពោះ​ការ​អញ្ជើញ និងស្វាគម៍យ៉ាងកក់ក្តៅ ព្រមទាំង ការលើកឡើងយ៉ាងស៊ីជម្រៅអំពីទំនាក់ទំនង រវាង​ប្រទេស​ទាំង​ពីរ។ សម្តេច បានលើកឡើងថា ទស្សនកិច្ចរបស់សម្តេច នាពេលនេះ ចំពេល នៃ​ខួប​៦៥​ឆ្នាំ នៃទំនាក់ទំនងការទូតនៃប្រទេសទាំងពីរ និងបន្ទាប់ពី តួកគីយេ និងកម្ពុជា បានដាក់​ស្ថាន​ទូត​ទៅ​វិញទៅមក។

សម្តេចតេជោ បានអរគុណ ឯកឧត្តមប្រធានសភា ដែលបាន​លើក​សរសើរ​គុណ​សម្បត្តិ​ដឹក​នាំ​របស់​សម្តេច​យ៉ាងខ្លាំង។ ក្នុងឋានៈជាប្រធានព្រឹទ្ធសភាថ្មី សម្តេចនឹងបន្តធ្វើអ្វីៗទាំងអស់ ដើម្បី​កម្ពុជា​បន្ត​រក្សា​បាននូវសន្តិភាព និង ស្ថិរភាពយូរអង្វែង។ សម្តេចតេជោបានអរគុណតួកគីផងដែរ ដែល​បានបញ្ជូនអនុប្រធានគណបក្សយុត្តិធម៌ និងអភិវឌ្ឍន៍តួកគី ទទួលបន្ទុកកិច្ចការបរទេស (AKP) ទៅចូលរួមមហាសន្និបាត ICAPP លើកទី១២ នៅទីក្រុងភ្នំពេញ កាលពីខែវិច្ឆិកា កន្លង​ទៅ​នេះ​។

សម្តេចតេជោ បានគូសបញ្ជាក់ថា សម្តេច ជាអ្នកផ្តល់សម្ទុះដល់ទំនាក់ទំនងទ្វេភាគីជាមួយតួកគី។ នៅ​ក្នុងពេលបំពេញទស្សនកិច្ចការងារនៅតួកគីឆ្នាំ២០១៨ សម្តេចតេជោ និងប្រធានាធិបតី Erdoğan បានដាក់​ផែន​ការ​សម្រេច​ឱ្យ​បាន​១ពាន់​លាន​ដុល្លារ​ក្នុង​ការ​ផ្លាស់​ប្តូរ​ពាណិជ្ជ​កម្ម​ទៅ​វិញ​ទៅ​មក​។

សម្ទុះ​កំណើនទំហំពាណិជ្ជកម្មទ្វេភាគីរវាងប្រទេសទាំងពីរ នៅមិន​ទាន់​ខិត​ជិត​ដល់​គោលដៅ​នៅ​ឡើយ​។ អាស្រ័យហេតុនេះ ទស្សនកិច្ចរបស់សម្តេច និងកិច្ចប្រឹងប្រែងរួម របស់គណបក្ស​ដឹកនាំ​ប្រទេស​ទាំង​ពីរ នឹងជំរុញផែនការនេះឱ្យបានសម្រេច ដោយផ្តល់អាទិភាព​លើ​កាលា​នុវត្តន៍​ភាព​សេដ្ឋកិច្ច​ពាណិជ្ជកម្ម និងវិនិយោគ។ សម្តេចតេជោ និងឯកឧត្តមប្រធានរដ្ឋសភា ក៏បាន​ប្តូរ​យោបល់ និងទស្សនៈវិភាគលើបញ្ហាតំបន់ និងអន្តរជាតិ។ ភាគីទាំងពីរ បានសង្ក​ត់​ធ្ងន់​លើ​ភាព​ចាំ​បាច់​នៃ​ការគោរពអធិបតេយ្យភាព និងបូរណភាពទឹកដីនៃប្រទេសនានាក្នុងសកលលោក។

សម្តេចតេជោ គាំទ្រតួនាទីសំខាន់របស់តួកគីយេ ជាអ្នកសម្របសម្រួលនៅក្នុងកិច្ចការអន្តរជាតិ ហើយ​សម្តេច គូសបញ្ជាក់ថា «មិនអាចយកសង្គ្រាម បញ្ចប់សង្គ្រាមបានទេ មានតែកិច្ចសន្ទនា និង​ការ​ចរចា»។ ភាគីទាំងពីរបានឯកភាពគ្នា មិនគាំទ្រទណ្ឌកម្មជាឯកតោភាគី។ សម្តេចបានលើកទឹកចិត្តឱ្យតួកគីសម្លឹងបែរទៅទិសខាងកើត ពោលគឺ ទ្វីបអាស៊ី ហើយកម្ពុជា នឹង​សម្រប​សម្រួល​ជាមួយបណ្តាប្រទេសអាស៊ាន ដើម្បីឱ្យតួកគីក្លាយ​ជាដៃគូ​សន្ទនា​ពេ​ញ​សិទ្ធិ​របស់​អាស៊ាន។​ ឆ្លៀតក្នុងឱកាសនោះ សម្តេចតេជោបានអញ្ជើញ ឯកឧត្តមប្រធាន​រដ្ឋសភាតួកគី​មក​បំពេញ​ទស្សន​កិច្ចនៅកម្ពុជា នាពេលខាងមុខ។

ឯកឧត្តមប្រធានរដ្ឋសភាបានវាយតម្លៃខ្ពស់ចំពោះការលើកឡើងរបស់សម្តេចតេជោ និង​សូម​អរគុណ និងទទួលដោយក្តីរីករាយ នូវការអញ្ជើញរបស់សម្តេចតេជោ និងរកពេលវេលាជាក់ស្តែង ក្នុង​ការមកបំពេញទស្សនកិច្ចនៅកម្ពុជា៕