អត្រាគាំទ្ររបស់ប្រជាជនកូរ៉េខាងត្បូង ចំពោះលោកប្រធានាធិបតី Yoon Suk Yeol បានធ្លាក់ចុះដល់កម្រិតទាបបំផុតចាប់តាំងពីលោកឡើងកាន់តំណែង បន្ទាប់ពីលោកបានព្យាយាមការពារការប្រកាសច្បាប់អាជ្ញាសឹករបស់ខ្លួន និងរុញច្រានប្រឆាំងនឹងកិច្ចខិតខំប្រឹងប្រែងទម្លាក់តំណែងជុំទីពីរដែលនឹងធ្វើឡើងនៅថ្ងៃសៅរ៍ (១៤ ធ្នូ) ស្អែកនេះ។

អត្រាគាំទ្រសម្រាប់លោក Yoon បានធ្លាក់ចុះដល់ ១១% នៅក្នុងការស្ទង់មតិប្រចាំសប្តាហ៍ដែលចេញផ្សាយនៅថ្ងៃសុក្រ (១៣ ធ្នូ) នេះពីទីភ្នាក់ងារ ហ្គាឡាប់ កូរ៉េ (Gallup Korea) ដែលធ្លាក់ចុះ ៥% ពីការស្ទង់មតិកាលពីសប្តាហ៍មុន។ អ្នកឆ្លើយតបបីភាគបួននិយាយថា ប្រធានាធិបតីរូបនេះគួរតែត្រូវបានចោទប្រកាន់ទម្លាក់តំណែង។

ការស្ទង់មតិនេះត្រូវបានចេញផ្សាយ បន្ទាប់ពីប្លុកបក្សប្រឆាំងរបស់កូរ៉េខាងត្បូង បានដាក់ញត្តិចោទប្រកាន់ទម្លាក់តំណែងជាលើកទីពីរប្រឆាំងនឹងលោក Yoon កាលពីថ្ងៃព្រហស្បតិ៍។ ឱកាសនៃការអនុម័តរបស់ញត្តិនោះហាក់មាននខ្ពស់ជាងការបោះឆ្នោតលើកមុន ដោយសារសមាជិកសភាជាច្រើនទៀតមកពីគណបក្សអំណាចប្រជាជន ផ្ទាល់របស់លោក Yoon បានបង្ហាញថាពួកគេនឹងគាំទ្រញត្តិនេះ។

ក្នុងចំណោមអ្នកឆ្លើយតបដែលមានទស្សនៈមិនគាំទ្រលោក Yoon មាន ៤៩% បានលើកឡើងពីការប្រកាសច្បាប់អាជ្ញាសឹករបស់លោក ថាជាកត្តាដ៏ធំបំផុតសម្រាប់ការធ្លាក់ចុះនៃប្រជាប្រិយភាពពីសារធារណជននេះ ហើយហេតុផលផ្សេងទៀតដែលលើកឡើងរួមមាន ស្ថានភាពសេដ្ឋកិច្ច និងកង្វះសមត្ថភាព៕