អាជ្ញាធរយោធាហ៊ួទី បាននិយាយកាលពីថ្ងៃអាទិត្យថា យន្តហោះអាមេរិក និងអង់គ្លេស បានធ្វើ «ការឈ្លានពានថ្មីមួយ»ប្រឆាំងនឹងគោលដៅនៅក្នុងីក្រុង Hodeida ដែលជាខេត្តយុទ្ធសាស្ត្រមួយ នៅភាគខាងលិចប្រទេសយេម៉ែន តាមបណ្តោយឆ្នេរសមុទ្រក្រហម។

យោងតាមរបាយការណ៍ បានឲ្យដឹងថា កងកម្លាំងសម្ព័ន្ធមិត្ត បានកំណត់គោលដៅលើស្រុក At-Tuhayta នៅភាគខាងត្បូងនៃទីក្រុង Hodeidah ទោះបីជាព័ត៌មានលម្អិតជាក់លាក់អំពីការទម្លាក់គ្រាប់បែកពីលើអាកាស មិនត្រូវបានបង្ហាញឲ្យដឹងភ្លាមៗក៏ដោយ។

ទន្ទឹមនឹងនេះ ឥស្សរជនក្នុងស្រុកដែលជិតស្និទ្ធនឹងក្រុមហ៊ួទី បាននិយាយថា៖«ការវាយប្រហារតាមអាកាស បានកំណត់គោលដៅលើទីតាំងយោធាដ៏សំខាន់មួយរបស់ក្រុមហ៊ួទី នៅក្នុងទីក្រុង Hodeidah»។

ចាប់តាំងពីខែវិច្ឆិកា ឆ្នាំ ២០២៣មក ក្រុមហ៊ួទី បាននិងកំពុងធ្វើការវាយប្រហារដោយមីស៊ីល និងយាន  ដ្រូន ទៅលើអ្វីដែលខ្លួន បាននិយាយថា នាវា«មានទំនាក់ទំនងជាមួយអ៊ីស្រាអែល» នៅក្នុងដែនទឹកក្នុងតំបន់ និងលើសពីនេះ ក៏ដូចជាគោលដៅក្នុងប្រទេសអ៊ីស្រាអែល ដើម្បីបង្ហាញពីសាមគ្គីភាពជាមួយប៉ាឡេស្ទីន នៅតំបន់ហ្កាហ្សា ស្របពេលមានជម្លោះរបស់ពួកគេ ជាមួយអ៊ីស្រាអែល។

ជាការឆ្លើយតប សម្ព័ន្ធកងទ័ពជើងទឹកអាមេរិក-អង់គ្លេស ដែលឈរជើងក្នុងតំបន់នេះ ចាប់តាំងពីខែមករា ឆ្នាំ ២០២៤ មក បានធ្វើការវាយឆ្មក់តាមអាកាស និងការវាយប្រហារដោយមីស៊ីល ប្រឆាំងនឹងគោលដៅរបស់ក្រុមហ៊ួទី ដើម្បីរារាំងក្រុមនេះ។