ក្រសួងការបរទេសរុស្ស៊ី បាននិយាយថា ខ្លួនបានជម្លៀសបុគ្គលិកការទូតរបស់ខ្លួនមួយចំនួនចេញពីប្រទេសស៊ីរី កាលពីថ្ងៃអាទិត្យ មួយសប្តាហ៍បន្ទាប់ពីការដួលរលំរបស់លោក បាសា អាល់អាសាដ (Bashar al-Assad )។

នាយកដ្ឋានទទួលបន្ទុកស្ថានការណ៍វិបត្តិរបស់ក្រសួងនេះ បានឲ្យដឹងនៅលើបណ្តាញTelegramថា៖«នៅថ្ងៃទី ១៥ ខែធ្នូ ការដកមួយផ្នែកនៃបុគ្គលិកនៃតំណាងការទូតរុស្ស៊ី នៅទីក្រុងដាម៉ាស( Damascus) ត្រូវបានធ្វើឡើងដោយជើងហោះហើរពិសេសរបស់កងទ័ពអាកាសរុស្ស៊ីពីមូលដ្ឋានអាកាស Hmeimim នៅក្នុងប្រទេសស៊ីរី។ 

ក្រសួងបានអះអាងថា ជើងហោះហើរនេះ បានមកដល់អាកាសយានដ្ឋានជិតទីក្រុងមូស្គូ ដោយមិនបានបញ្ជាក់ពីចំនួនមនុស្ស នៅលើយន្តហោះនោះទេ។

នាយកដ្ឋាននេះ បានឲ្យដឹងទៀតថា ការហោះហើរនេះ ក៏បានដឹកសមាជិកមកពីបេសកកម្មការទូតនៃប្រទេសបេឡារុស កូរ៉េខាងជើង និងតំបន់អាប់ខាហ្ស៊ី (Abkhazia) ជាតំបន់បំបែកខ្លួនរបស់ប្រទេសហ្ស៊កហ្ស៊ីដែលគាំទ្រដោយទីក្រុងមូស្គូ។ 

សេចក្តីប្រកាសព័ត៌មានដែលបានចេញផ្សាយនៅលើបំណ្តាញ Telegram បានបញ្ជាក់ថា៖«ស្ថានទូតរុស្ស៊ីនៅទីក្រុងដាម៉ាស នៅតែបន្តដំណើរការ»។

បន្ទាប់ពីការវាយលុករយៈពេល ១១ថ្ងៃ ក្រុមចម្រុះឧទ្ទាមដែលគ្រប់គ្រងដោយក្រុមឥស្លាមនិយម Hayat Tahrir Al-Sham (HTS) បានផ្តួលរំលំលោក អាសាដ ដែលបានភៀសខ្លួនទៅកាន់ប្រទេសរុស្ស៊ី រួមជាមួយនឹងក្រុមគ្រួសាររបស់គាត់។