គណៈកម្មការសហភាពអឺរ៉ុប នៅថ្ងៃចន្ទ (ទី១៦ ខែធ្នូ) បានឲ្យដឹងនៅក្នុងសេចក្តីថ្លែងការណ៍មួយថា សហភាពអឺរ៉ុប (EU) បានអនុម័តកញ្ចប់ទណ្ឌកម្មទី១៥ ប្រឆាំងនឹងរុស្សី ជុំវិញការលុកលុយរបស់ប្រទេសនេះលើអ៊ុយក្រែន ក្នុងនោះរួមទាំងវិធានការតឹងរ៉ឹងលើអង្គភាពរបស់ប្រទេសចិន និងនាវាជាច្រើនទៀត ជាអ្វីដែលហៅថា កងនាវាស្រមោលរបស់ទីក្រុងមូស្គូ។

កញ្ចប់ទណ្ឌកម្មថ្មីបន្ថែមនាវាចំនួន ៥២គ្រឿង ពីកងនាវាស្រមោលដែលព្យាយាមគេចពីការរឹតបន្តឹងរបស់លោកខាងលិច ដើម្បីដឹកជញ្ជូនប្រេង អាវុធ និងគ្រាប់ធញ្ញជាតិ។ ការប្រកាសនេះនាំឲ្យចំនួនសរុបដែលបានចុះក្នុងបញ្ជីទណ្ឌកម្មឡើងដល់ ៧៩គ្រឿងហើយ។

គួរបញ្ជាក់ថា EU បានចាប់ផ្តើមបន្ថែមនាវាទៅក្នុងទណ្ឌកម្មរបស់ខ្លួន នៅដើមឆ្នាំនេះ ដើម្បីឆ្លើយតបទៅនឹងការកើនឡើងនូវចំនួននៃនាវាដឹកជញ្ជូនទំនិញដែលមិនត្រូវបានគ្រប់គ្រង ឬធានាដោយអ្នកផ្តល់សេវាតាមស្តង់ដាររបស់លោកខាងលិច។ ការចុះបញ្ជីនោះ ក៏រួមមាននាវាដែលបញ្ជូនគ្រាប់រំសេវរបស់កូរ៉េខាងជើងទៅឲ្យរុស្ស៊ីផងដែរ។

ការរឹតបន្តឹងថ្មីនេះ បន្ថែមបុគ្គល និងអង្គភាពថ្មីចំនួន ៨៤ទៀត ក្នុងរួមទាំងបុគ្គល និងអង្គភាពចំនួន ៧ របស់ចិនផងដែរ៕