ប្រទេសចំនួន១០ និងសហភាពអឺរ៉ុប បានចាត់ទុកការជាប់ពាក់ព័ន្ធដែលកំពុងកើនឡើងរបស់ប្រទេសកូរ៉េខាងជើងក្នុងសង្គ្រាមរុស្ស៊ីនៅអ៊ុយក្រែនថា ជា «ការពង្រីកជម្លោះដ៏គ្រោះថ្នាក់» នៅក្នុងសេចក្តីថ្លែងការណ៍រួមមួយ ចេញផ្សាយដោយសហរដ្ឋអាមេរិក។

ទីក្រុងព្យុងយ៉ាង បានបញ្ជូនទាហានរាប់ពាន់នាក់ ដើម្បីជួយដល់កិច្ចខិតខំប្រឹងប្រែងសង្រ្គាមរបស់រុស្ស៊ី រួមទាំងទៅកាន់ព្រំដែនតំបន់ Kursk ដែលអ៊ុយក្រែនបានរាយការណ៍កាលពីថ្ងៃចន្ទថា ទាហានរបស់ខ្លួនបានសម្លាប់ ឬធ្វើឱ្យទាហានកូរ៉េខាងជើងរងរបួសយ៉ាងហោចណាស់៣០នាក់។

សេចក្តីថ្លែងការណ៍ បាននិយាយថា «ការគាំទ្រដោយផ្ទាល់របស់កូរ៉េខាងជើងចំពោះសង្គ្រាមឈ្លានពានរបស់រុស្ស៊ីប្រឆាំងអ៊ុយក្រែន បង្ហាញពីការពង្រីកជម្លោះដ៏គ្រោះថ្នាក់ ដោយមានផលវិបាកធ្ងន់ធ្ងរដល់សន្តិសុខសហភាពអឺរ៉ុប និងតំបន់ឥណ្ឌូ-ប៉ាស៊ីហ្វិក» ដោយនិយាយសំដៅទៅលើប្រទេសកូរ៉េខាងជើង ជាមួយអក្សរកាត់ផ្លូវការរបស់ខ្លួន។

រដ្ឋមន្ត្រីការបរទេសនៃប្រទេសអូស្ត្រាលី កាណាដា បារាំង អាល្លឺម៉ង់ អ៊ីតាលី ជប៉ុន កូរ៉េខាងត្បូង នូវែលសេឡង់ ចក្រភពអង់គ្លេស សហរដ្ឋអាមេរិក និងអ្នកតំណាងជាន់ខ្ពស់របស់សហភាពអឺរ៉ុប បានចុះហត្ថលេខាលើការចេញផ្សាយនេះ។

ក្រុមរដ្ឋមន្ត្រី បានបង្ហាញ «ការព្រួយបារម្ភយ៉ាងខ្លាំងអំពីការគាំទ្រផ្នែកនយោបាយ យោធា ឬសេដ្ឋកិច្ចណាមួយ ដែលរុស្ស៊ីអាចនឹងផ្តល់ដល់កម្មវិធីសព្វាវុធខុសច្បាប់របស់ប្រទេសកូរ៉េខាងជើង រួមទាំងអាវុធមហាប្រល័យ»។