ឧស្សាហកម្មទេសចរណ៍របស់កូរ៉េខាងត្បូង កំពុងត្រៀមខ្លួនទប់ទល់ផលប៉ះពាល់ទៅលើវិស័យនេះ ស្របពេលមានវិបត្តិនយោបាយកំពុងបន្ត ដែលបានចាប់ផ្តើមនៅពេលលោកប្រធានាធិបតី Yoon Suk Yeol ប្រកាសច្បាប់អាជ្ញាសឹកកាលពីថ្ងៃទី០៣ ខែធ្នូ។

អាជ្ញាធររំពឹងថា កូរ៉េខាងត្បូងនឹងមិនសម្រេចគោលដៅសម្រាប់ការចូលមកដល់របស់ភ្ញៀវទេសចរទេនៅឆ្នាំនេះ ដោយសណ្ឋាគារ និងភ្នាក់ងារទេសចរណ៍មួយចំនួននៅក្នុងរដ្ឋធានីសេអ៊ូល និយាយថា ពួកគេបានមើលឃើញការលុបចោលមួយចំនួនរួចទៅហើយ ដោយសារក្ដីបារម្ភពីសុវត្ថិភាពកាលពីសប្តាហ៍មុន។

កូរ៉េខាងត្បូង នៅតែសង្ឃឹមថានឹងទាក់ទាញភ្ញៀវទេសចររាប់លាននាក់បន្ថែមទៀតសម្រាប់រយៈពេលដែលនៅសល់នៃឆ្នាំនេះ ដោយសាររដូវរដូវរងាក្នុងខែធ្នូ នេះ ជាធម្មតាគឺជារយៈពេលដែលមានភ្ញៀវទេសចរទៅលេងច្រើនបំផុត ជាពិសេសអ្នកមកពីអាស៊ីអាគ្នេយ៍។

ក្រុមមន្ត្រីកំពុងប្រឹងប្រែងបង្វែរផលប៉ះពាល់លើកេរ្តិ៍ឈ្មោះប្រទេស ដែលជាគោលដៅទេសចរណ៍មួយនេះ។ គួរបញ្ជាក់ថា វិស័យទេសចរណ៍បានរួមចំណែកយ៉ាងសំខាន់ដល់សេដ្ឋកិច្ចកូរ៉េខាងត្បូង ហើយបង្កើតបានប្រហែល ៨៥ពាន់ពាន់លានវ៉ុន (៥៩,១ ពាន់លានដុល្លារ) ដែលស្មើនឹងប្រហែល ៤% នៃផលិតផលក្នុងស្រុកសរុប (GDP) របស់ខ្លួនកាលពីឆ្នាំមុន៕