ក្រុមហ៊ុន OpenAI កាលពីថ្ងៃចន្ទ (ទី១៦ ខែធ្នូ) បានប្រាប់ឲ្យដឹងថា ខ្លួនកំពុងធ្វើឲ្យការស្វែងរកតាមប្រព័ន្ធអ៊ីនធឺណិត ដែលដំណើរការដោយបច្ចេកវិទ្យា ChatGPT អាចមានសម្រាប់អ្នកប្រើប្រាស់ទាំងអស់ ដោយការបើកដំណើរការនេះបង្កើនការគំរាមកំហែងដល់ភាពនាំមុខគេរបស់ Google។

ក្រុមហ៊ុនបច្ចេកវិទ្យាដែលមានមូលដ្ឋាននៅទីក្រុង San Francisco សហរដ្ឋអាមេរិក បានធ្វើឲ្យប្រសើរឡើងនូវកម្មវិធី Chatbot AI (បញ្ញាសិប្បនិម្មិត) របស់បច្ចេកវិទ្យា ChatGPT ឲ្យមានសមត្ថភាពស្វែងរក កាលពីចុងខែតុលា ប៉ុន្តែមុខងារនេះអាចត្រូវបានប្រើប្រាស់ ចំពោះតែអតិថិជនដែលបង់ប្រាក់ប៉ុណ្ណោះ។

ក្រុមហ៊ុនបានឲ្យដឹងថា មុខងារស្វែងរកសាធារណៈថ្មីនេះអាចឲ្យអ្នកប្រើប្រាស់ទទួលបាន «ចម្លើយយ៉ាងឆាប់រហ័ស និងទាន់ពេលវេលា» ដោយមានតំណភ្ជាប់ទៅកាន់ប្រភពគេហទំព័រពាក់ព័ន្ធទាំងអស់ ពោលគឺព័ត៌មានដែលពីមុនត្រូវការប្រើម៉ាស៊ីនស្វែងរកបែបប្រពៃណី។ ការធ្វើឲ្យប្រសើរឡើង ចំពោះបច្ចេកវិទ្យា ChatGPT អាចឲ្យកម្មវិធី Chatbot AI ផ្តល់ព័ត៌មានតាមពេលវេលាជាក់ស្តែងពីទូទាំងវេបសាយ។

ក្នុងវីដេអូមួយដែលបានបង្ហោះនៅលើឆាណែល YouTube លោក Kevin Weil ប្រធានផ្នែកផលិតផលរបស់ក្រុមហ៊ុន OpenAI បានឲ្យដឹងថា៖ «យើងកំពុងនាំយកការស្វែងទៅកាន់អ្នកប្រើប្រាស់ទាំងអស់ដែលបានចុះឈ្មោះដោយឥតគិតថ្លៃ នៅលើបច្ចេកវិទ្យា ChatGPT។ នោះមានន័យថា វានឹងអាចប្រើបានជាសកល នៅគ្រប់វេទិកា ដែលអ្នកប្រើបច្ចេកវិទ្យា ChatGPT»។

ឧទាហរណ៍ជាច្រើននៃចំណុចប្រទាក់ថ្មីដែលបង្ហាញដោយក្រុមហ៊ុន OpenAI ប្រហាក់ប្រហែលនឹងលទ្ធផលស្វែងរកដែលផ្តល់ដោយក្រុមហ៊ុន Google និង Google Maps តែគ្មានភាពរញ៉េរញ៉ៃពីការផ្សាយពាណិជ្ជកម្ម៕