ប្រមុខបញ្ជាការជាន់ខ្ពស់កងទ័ពរបស់អ៊ុយក្រែន បាននិយាយកាលពីថ្ងៃអង្គារ (១៧ ធ្នូ) ថា ទីក្រុងមូស្គូ បានបង្កើនការវាយប្រហាររបស់ខ្លួនទៅលើកងកម្លាំងទីក្រុងគីវ ដែលកំពុងប្រយុទ្ធដើម្បីកាន់កាប់តំបន់ ឃើស (Kursk) របស់រុស្ស៊ី និងបង្កើនសម្ពាធកាន់តែខ្លាំងលើតំបន់ ដូណិត (Donetsk) ភាគខាងកើតរបស់អ៊ុយក្រែន។

នៅពេលសង្រ្គាមខិតជិតដល់ឆ្នាំទី៣ របស់ខ្លួន កងទ័ពអ៊ុយក្រែន មានការនឿយហត់ ទាំងអាវុធ និងកម្លាំងមនុស្ស ព្រមទាំងចាញ់ប្រៀបខ្លាំងនៅតាមបណ្តោយជួរមុខ ១.១៧០គីឡូម៉ែត្ររបស់ខ្លួន។ បញ្ជាការជាន់ខ្ពស់អ៊ុយក្រែន លោក អូឡេកសានដឺ ស៊ីស្គី (Oleksandr Syrskyi) បានលើកឡើងក្នុងសុន្ទរកថាមួយថា "សម្រាប់ថ្ងៃទីបីជាប់គ្នា រុស្ស៊ីកំពុងវាយលុកយ៉ាងខ្លាំងក្លានៅក្នុងតំបន់ Kursk"។

លោក Syrskyi បន្តថា ការប្រយុទ្ធគ្នាក៏កំពុងកើនឡើងផងដែរនៅក្នុងតំបន់ Donetsk ភាគខាងកើត ដែលកងកម្លាំងរុស្ស៊ី កំពុងវាយរុលក្នុងល្បឿនដ៏លឿនបំផុតរបស់ពួកគេនៅឆ្នាំនេះ។ លោកបានប្រាប់រដ្ឋាភិបាល និងមន្ត្រីក្នុងតំបន់ថា ទាហានរុស្ស៊ី បន្តផ្តោតការវាយលុករបស់ពួកគេលើមជ្ឈមណ្ឌលភស្តុភារនៃទីក្រុង ផុករ៉ូវ (Pokrovsk) និង គូរ៉ាខូវ (Kurakhove)។

ក្រសួងការពារជាតិរុស្ស៊ី និយាយថា កងកម្លាំងរបស់ខ្លួនបានដណ្តើមយកភូមិ ហាននីវកា (Hannivka) ភាគខាងជើងនៃទីក្រុង Pokrovsk ជាទីតាំងនៃការប៉ះទង្គិចគ្នាខ្លាំងរបស់អ៊ុយក្រែន ដែលផលិតធ្យូងថ្មសម្រាប់ឧស្សាហកម្មដែក។ យោធាអ៊ុយក្រែន មិនបានលើកឡើងពីភូមិនេះទេ ប៉ុន្តែបាននិយាយនៅក្នុងរបាយការណ៍ពេលយប់របស់ខ្លួនថា កងកម្លាំងទីក្រុងគីវ បានវាយបកវិញលើការវាយប្រហាររបស់រុស្ស៊ីចំនួន ២៣លើក ក្នុងចំណោម៣៥ នៅតំបន់នោះ ហើយស្ថានការណ៍នៅតែតានតឹង៕