ប្រភពការទូតមួយបាននិយាយកាលពីថ្ងៃអង្គារ (១៧ ធ្នូ) ថា អង្គការណាតូ (NATO) បានទទួលសម្របសម្រួលជំនួយយោធាលោកខាងលិចដល់អ៊ុយក្រែន បន្តពីសហរដ្ឋអាមេរិក តាមការគ្រោងទុក នៅក្នុងជំហានដែលត្រូវគេមើលឃើញយ៉ាងទូលំទូលាយថាមានបំណងការពារយន្តការគាំទ្រទីក្រុងគីវ ប្រឆាំងនឹងប្រធានាធិបតីជាប់ឆ្នោតអាមេរិក លោក Donald Trump ដែលមានចិត្តសង្ស័យលើសម្ព័ន្ធយោធា។

វិធានការដែលកើតឡើងបន្ទាប់ពីការពន្យារពេលជាច្រើនខែនេះ បានផ្តល់ឱ្យអង្គការណាតូ នូវតួនាទីផ្ទាល់បន្ថែមទៀត ក្នុងសង្គ្រាមប្រឆាំងនឹងប្រតិបត្តិការយោធារបស់រុស្ស៊ី ដោយមិនចាំបាច់ប្រើប្រាស់កងកម្លាំងរបស់ខ្លួន។

ទោះបីជាយ៉ាងណាក៏ដោយ ក្រុមអ្នកការទូតទទួលស្គាល់ថា ការប្រគល់តួនាទីនេះទៅឱ្យណាតូ បានផលតិចតួចប៉ុណ្ណោះ ដោយសារអាមេរិក ក្រោមការដឹកនាំរបស់លោក Trump នៅតែអាចបង្កវិបត្តិដ៏ធំមួយសម្រាប់អ៊ុយក្រែន តាមរយៈការកាត់បន្ថយការគាំទ្ររបស់ខ្លួន ព្រោះអាមេរិក ជាក្បាលម៉ាស៊ីនរបស់សម្ព័ន្ធយោធា និងជាអ្នកបំពាក់អាវុធភាគច្រើនដល់ទីក្រុងគីវ។

លោក Trump ដែលនឹងចូលកាន់តំណែងនៅខែមករាខាងមុខនេះ បាននិយាយថា លោកចង់បញ្ចប់សង្រ្គាមនៅអ៊ុយក្រែនឱ្យបានឆាប់ ប៉ុន្តែមិនបានបកស្រាយថាធ្វើដូចម្ដេចនោះទេ។ លោកបានរិះគន់ជាយូរមកហើយអំពីទំហំនៃជំនួយហិរញ្ញវត្ថុ និងយោធារបស់អាមេរិក ដល់អ៊ុយក្រែន៕