នគរបាលរដ្ឋ Wisconsin កាលពីថ្ងៃអង្គារ ទី១៧ ខែធ្នូ កំពុងសម្ភាសន៏មិត្តភ័ក្តិ និងក្រុមគ្រួសារ និងពិនិត្យមើលវត្តមានលើបណ្តាញអ៊ីនធឺណិតរបស់ក្មេងស្រីអាយុ ១៥ឆ្នាំ ដើម្បីកំណត់ពីអ្វីដែលបានជំរុញឱ្យក្មេងស្រីរូបនេះ បាញ់ប្រហារនៅក្នុងថ្នាក់រៀននៅសាលារៀនគ្រិស្ទានឯកជនមួយកន្លែង ដោយបានសម្លាប់សិស្សរួមថ្នាក់ម្នាក់ និងគ្រូបង្រៀនម្នាក់ មុនសម្លាប់ខ្លួនឯង។

ខ្មាន់កាំភ្លើង ត្រូវបាននគរបាលកំណត់អត្តសញ្ញាណឈ្មោះ Natalie Rupnow គឺជាសិស្សនៅសាលារៀនគ្រិស្ទានឯកជន ក្នុងទីក្រុង Madison រដ្ឋ Wisconsin សហរដ្ឋអាមេរិក។

ស្ត្រី និងក្មេងស្រី មានការអនុវត្តន៍តិចតួចបំផុតជាអ្នកវាយប្រហារ បើប្រៀបធៀបនឹងបុរស។ ការសិក្សាបានបង្ហាញថា មានត្រឹមតែ៣ភាគរយប៉ុណ្ណោះនៃការបាញ់ប្រហារទ្រង់ទ្រាយធំនៅសហរដ្ឋអាមេរិកទាំងអស់ ត្រូវបានប្រព្រឹត្តដោយស្ត្រី។

លោក Shon Barnes អធិការនគរបាលទីក្រុង Madison បាននិយាយនៅក្នុងសន្និសីទសារព័ត៌មាន ថា «ការកំណត់អត្តសញ្ញាណពីការជម្រុញឲ្យធ្វើសកម្មភាព គឺជាអាទិភាពចម្បងរបស់យើង ប៉ុន្តែនៅពេលនេះ វាហាក់ដូចជាការជម្រុញនេះ មានកត្តារួមផ្សំច្រើន។

លោក Barnes ពុំបានផ្តល់ព័ត៌មានលម្អិតបន្ថែមទៀតនោះទេ ដោយនិយាយថា លោកមិនចង់ធ្វើឱ្យប៉ះពាល់ដល់ការស៊ើបអង្កេត។ អ្នកស៊ើបអង្កេត កំពុងពិនិត្យមើលក្នុងទូរស័ព្ទដៃ កុំព្យូទ័រ និងការបង្ហោះលើបណ្តាញអ៊ីនធឺណិតរបស់ក្មេងស្រីរូបនេះ។