ប្រភពពីរដែលដឹងពីផែនការទស្សនកិច្ចអាមេរិក បានឱ្យដឹងថា ប្រេសិតអ៊ុយក្រែន ដែលជិតចូលកាន់តំណែងរបស់លោកប្រធានាធិបតីជាប់ឆ្នោត Donald Trump នឹងធ្វើដំណើរទៅកាន់ទីក្រុងគីវ និងរដ្ឋធានីអឺរ៉ុបមួយចំនួនទៀត នៅដើមខែមករា ខណៈរដ្ឋបាលថ្មីរបស់ទីក្រុងវ៉ាស៊ីនតោន ព្យាយាមបញ្ចប់សង្រ្គាមរុស្ស៊ី-អ៊ុយក្រែន យ៉ាងឆាប់រហ័ស។

ប្រភពដែលសុំមិនបញ្ចេញឈ្មោះនោះនិយាយថា ឧត្តមសេនីយចូលនិវត្តន៍ លោក ខេត ឃែលឡុក (Keith Kellogg) ដែលត្រូវបានដាក់ឈ្មោះឱ្យធ្វើជាបេសកជនពិសេសរបស់លោក Trump ប្រចាំអ៊ុយក្រែន និងរុស្ស៊ីនោះ មិនមានគម្រោងទៅទស្សនកិច្ចនៅទីក្រុងមូស្គូ ក្នុងដំណើរនេះទេ។

ប្រភពដដែលបានបន្តថា ជំនួសមកវិញ លោកនឹងទៅជួបថ្នាក់ដឹកនាំជាន់ខ្ពស់ក្នុងទីក្រុងគីវ ហើយក្រុមរបស់លោកកំពុងធ្វើការដើម្បីរៀបចំកិច្ចប្រជុំជាមួយមេដឹកនាំនៅក្នុងរដ្ឋធានីអឺរ៉ុបផ្សេងទៀត ដូចជាទីក្រុងរ៉ូម និងប៉ារីសជាដើម។

ប្រភពមួយក្នុងចំណោមនោះបានព្រមានថា គម្រោងទស្សនកិច្ចនេះនៅមិនទាន់សម្រេចនៅឡើយទេ ហើយដំណើរការអាចនឹងផ្លាស់ប្តូរ។ ដំណើរដែលបានគ្រោងទុកភ្លាមៗបន្ទាប់ពីថ្ងៃចូលឆ្នាំថ្មីនេះ បង្ហាញពីភាពបន្ទាន់ដែលលោក Trump ខិតខំជំរុញ ក្នុងការបញ្ចប់សង្រ្គាមនៅអ៊ុយក្រែន៕