ប្រព័ន្ធផ្សព្វផ្សាយរដ្ឋស៊ីរី បានរាយការណ៍កាលពីថ្ងៃអង្គារ (១៧ ធ្នូ) ថា មេដឹកនាំសម្ព័ន្ធក្រុមឧទ្ទាមដែលបានឡើងកាន់អំណាចក្នុងប្រទេសស៊ីរី កាលពីខែធ្នូ បាននិយាយថា ក្រុមប្រឆាំងប្រដាប់អាវុធទាំងអស់នៅក្នុងប្រទេសនឹងត្រូវរំលាយ ហើយបង្រួបបង្រួមគ្នាក្រោមរដ្ឋាភិបាលថ្មី ខណៈខ្លួនប្រឹងប្រែងកសាងរដ្ឋដែលដំណើរការ។។

លោក អាម៉េដ អាល់-សារ៉ាអា (Ahmed al-Sharaa) ប្រធានក្រុមឧទ្ទាម បាននិយាយថា យុទ្ធជនឧទ្ទាមនឹងត្រូវនាំមកក្រោមការគ្រប់គ្រងរបស់ក្រសួងការពារជាតិ។

គេមិនច្បាស់ទេថា តើរឿងនេះនឹងសម្រេចបានដោយរបៀបណា ឬនៅពេលណា ឬថា តើក្រុមប្រដាប់អាវុធដ៏ប្រកួតប្រជែងទាំងនោះនឹងយល់ព្រម ឬក៏អត់នោះទេ។ ប៉ុន្តែលោក Sharaa ដែលពីមុនត្រូវបានគេស្គាល់ថាឈ្មោះ អាប៊ូ ម៉ូហាម៉េដ អាល់-ហ្គោឡានី (Abu Mohammed al-Golani) បាននិយាយថា "អ្នកគ្រប់គ្នាត្រូវតែស្ថិតនៅក្រោមច្បាប់" នេះបើយោងតាមទីភ្នាក់ងារសារព័ត៌មានរដ្ឋ Sana របស់ស៊ីរី។

ការអត្ថាធិប្បាយរបស់មេដឹកនាំក្រុមឧទ្ទាមរូបនេះ បានកើតឡើងជាងមួយសប្តាហ៍ បន្ទាប់ពីការដួលរលំនៃរបបលោកប្រធានាធិបតី Bashar al-Assad ខណៈអាជ្ញាធរថ្មីនៅក្នុងរដ្ឋធានីដាម៉ាស របស់ស៊ីរី បានស្វះស្វែងរកស្ថិរភាព បន្ទាប់ពីសង្គ្រាមស៊ីវិលអស់រយៈពេល ១៣ឆ្នាំ។ ថ្នាក់ដឹកនាំស៊ីរីថ្មីនេះក៏មានគោលបំណងបង្កើនការទទួលស្គាល់ពីអន្តរជាតិតាមរយៈកិច្ចប្រជុំជាបន្តបន្ទាប់ជាមួយអ្នកការទូតមកពីអឺរ៉ុប អង្គការសហប្រជាជាតិ និងមជ្ឈិមបូព៌ា៕