មន្ត្រីជាន់ខ្ពស់របស់អង្គការសហប្រជាជាតិ កំពុងជំរុញសហគមន៍អន្តរជាតិឱ្យបង្កើនជំនួយមនុស្សធម៌ដល់ប្រទេសស៊ីរី បន្ទាប់ពីការដួលរលំនៃរដ្ឋាភិបាលរបស់ប្រធានាធិបតី លោក Bashar al-Assad ។

បេសកជនពិសេសរបស់អង្គការសហប្រជាជាតិទទួលបន្ទុកប្រទេសស៊ីរី លោក Geir Pedersen និងអ្នកសម្របសម្រួលជំនួយបន្ទាន់ លោក Tom Fletcher កំពុងបំពេញទស្សនកិច្ចនៅក្នុងប្រទេសនេះ។ មន្ត្រីទាំងពីរ បានរាយការណ៍សង្ខេបដល់ក្រុមប្រឹក្សាសន្តិសុខ តាមរយៈតំណរភ្ជាប់វីដេអូ កាលពីថ្ងៃអង្គារ។ លោក Fletcher បានរាយការណ៍ថា លោកត្រូវបានលើកទឹកចិត្តដោយការពិភាក្សាជាមួយមេដឹកនាំនៃរដ្ឋាភិបាលបណ្តោះអាសន្នរបស់ប្រទេសស៊ីរី។ លោកនិយាយថា «មេដឹកនាំរដ្ឋាភិបាលនេះបានប្តេជ្ញាចិត្តចំពោះអ្វីដែលនឹងក្លាយជាការពង្រីកការគាំទ្រផ្នែកមនុស្សធម៌ដ៏សំខាន់»។

លោក Fletcher បានជំរុញឱ្យប្រទេសសមាជិកអង្គការសហប្រជាជាតិ ដកទណ្ឌកម្មសេដ្ឋកិច្ចលើប្រទេសស៊ីរី។ លោកនិយាយថា «យើងត្រូវការរដ្ឋទាំងអស់ដើម្បីជួយសម្រួលដល់កិច្ចខិតខំប្រឹងប្រែងមនុស្សធម៌ រួមទាំងការធានាបានថា ទណ្ឌកម្ម និងវិធានការប្រឆាំងភេរវកម្ម ពុំត្រូវបានរារាំងដល់ប្រតិបត្តិការមនុស្សធម៌»។

លោក Pedersen បានសង្កត់ធ្ងន់លើតម្រូវការសម្រាប់ការគាំទ្រ ដោយបាននិយាយថា ៩០ភាគរយនៃប្រជាជនស៊ីរីកំពុងរស់នៅក្នុងភាពក្រីក្រ។ ជម្លោះ នៅពុំទាន់បញ្ចប់នៅឡើយ ហើយស្ថិរភាព អាចមានភាពផុយស្រួយនៅក្នុងផ្នែកជាច្រើនរបស់ប្រទេសស៊ីរី។