មេដឹកនាំខាងក្រុមស្តាំនិយមជ្រុលរបស់ប្រទេសបារាំង គឺលោកស្រី Marine Le Pen នៅថ្ងៃពុធ (ទី១៨ ខែធ្នូ) នេះ បាននិយាយថា លោកស្រីកំពុងត្រៀមខ្លួន សម្រាប់ការបោះឆ្នោតប្រធានាធិបតីមុនកាលកំណត់ ដោយលើកឡើងថា ពេលវេលានៅក្នុងតំណែងរបស់ប្រធានាធិបតី លោក Emmanuel Macron គឺស្ទើរតែចប់ហើយ។

លោកស្រី Le Pen ដែលបាននាំគណបក្សប្រឆាំងជនអន្តោប្រវេសន៍ គឺបក្សរួបរួមជាតិ (RN) របស់លោកស្រីពីឋានៈបន្ទាប់បន្សំ រហូតបានក្លាយជាទីចាប់អារម្មណ៍ផ្នែកនយោបាយ ត្រូវបានគេមើលឃើញថា ជាបេក្ខជនប្រធានាធិបតីនាំមុខគេ។ លោកស្រីបានឈរឈ្មោះតទល់ជាមួយលោក Macron ក្នុងឆ្នាំ២០១៧ ហើយទទួលបានចំណែកសន្លឹកឆ្នោតកាន់តែច្រើននៃការបោះឆ្នោត នៅឆ្នាំ២០២២ នៅពេលដែលលោក Macron បានឈ្នះតំណែងរយៈពេល ៥ឆ្នាំមួយអាណត្តិទៀត។

ក្នុងបទសម្ភាសន៍ជាមួយសារព័ត៌មាន Le Parisien លោកស្រីបាននិយាយថា៖ «ខ្ញុំកំពុងត្រៀមខ្លួនសម្រាប់ការបោះឆ្នោតប្រធានាធិបតីមុនកាលកំណត់ ជាមួយនឹងការប្រុងប្រយ័ត្ន ដោយពិចារណាលើភាពមិននឹងនររបស់លោក Emmanuel Macron ពោលគឺជាអ្វីដែលលោកនៅសល់ឥទ្ធិពលនយោបាយតិចតួច»។

អមដោយការបន្ថែមថា លោក Macron បានធ្លាក់ចុះប្រជាប្រិយភាពទាំងក្នុងស្រុក និងអន្តរជាតិនោះ លោកស្រីបានសង្កត់ធ្ងន់ថា៖ «លោក Emmanuel Macron បានចប់ហើយ ឬជិតចប់ហើយ។ លោកបានធ្វើឲ្យមនុស្សគ្រប់គ្នាមានកំហឹង។ លោកមិនមានឥទ្ធិពលទៀតទេ នៅក្នុងសហភាពអឺរ៉ុប»។

លោក Macron បានលើកឡើងម្តងហើយម្តងទៀតថា លោកនឹងមិនលាលែងពីតំណែងនោះទេ។ នៅពេលត្រូវបានសួរពីប្រតិកម្ម វិមាន Elysee បានឆ្លើយតបថា៖ «លោកប្រធានាធិបតីបានបង្ហាញខ្លួនឯងរួចហើយ ចំពោះបញ្ហានេះ»។

យ៉ាងណាក្ដី លោកស្រី Le Pen ត្រូវប្រឈមមុខនឹងបញ្ហានយោបាយផ្ទាល់ខ្លួន។ លោកស្រី និងសមាជិកផ្សេងទៀតនៃគណបក្សរបស់លោកស្រី ត្រូវបានចោទប្រកាន់ថា បានប្រើប្រាស់មូលនិធិពីសហភាពអឺរ៉ុប ដើម្បីទូទាត់ប្រាក់ឲ្យបុគ្គលិកគណបក្ស នៅប្រទេសបារាំង។ ប្រសិនបើត្រូវបានផ្ដន្ទាទោស លោកស្រីអាចត្រូវបានហាមឃាត់មិនឲ្យស្វែងរកមុខតំណែងសាធារណៈរយៈពេល ៥ឆ្នាំ។ សវនាការនេះត្រូវបានគេរំពឹងថា នឹងបិទបញ្ចប់នៅខែមីនា៕