ក្រសួងសេដ្ឋកិច្ច និងហិរញ្ញវត្ថុ រៀបចំសេចក្តីព្រាងប្រកាសស្តីពីលទ្ធកម្ម ដើម្បីលើក​ស្ទួយ​សហ​គ្រាស​ធុន​មីក្រូ តូច និងមធ្យម និងសហគ្រិនភាព ដើម្បីរួមចំណែកដល់ការបង្កើត​ឱកាស​ការងារ​ក្នុង​ស្រុក ការលើកកម្ពស់ផលិតភាព បង្កើតគំនិតច្នៃប្រឌិត និងនវានុវត្តន៍ និងការពង្រឹង​សមត្ថភាព​ប្រកួតប្រជែងរបស់កម្ពុជានៅក្នុងទីផ្សារតំបន់ និងសកល។

ឯកឧត្តម ហ៊ីវ សុវណ្ណ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ លើក​ឡើង​នៅ​ក្នុង​សិក្ខា​សាលា​ពិគ្រោះ​យោបល់ លើសេចក្តី ព្រាងប្រកាស ស្តីពីលទ្ធកម្មតា​ម​រយៈ​ការ​ផ្តល់​ប្រព្រឹត្តកម្ម​អនុ​គ្រោះ នៅថ្ងៃទី១៨ ខែ ធ្នូ ម្សិលមិញនេះថា គោលបំណងនៃការៀបចំសិក្ខា សាលានាពេលនេះ គឺ​ដើម្បី​ពិគ្រោះយោបល់ និងប្រមូលធាតុចូលបន្ថែមទៀត សម្រាប់ឱ្យការរៀបចំសេចក្តីព្រាងប្រកាស ស្តីពី​លទ្ធកម្ម តាមរយៈការផ្តល់ប្រព្រឹត្តិកម្មអនុគ្រោះ កាន់តែមានសុក្រឹតភាព មានភាព​គ្រប់​ជ្រុង​ជ្រោយ និងមានសង្គតិភាព ជាមួយលិខិតបទដ្ឋាន គតិយុត្តជាធរមានដទៃទៀត ព្រមទាំងអា​ច​ផ្តល់​នូវ​លទ្ធផលវិជ្ជមាន ចំពោះសេដ្ឋកិច្ចជាតិ ក៏ដូចជាសម្រាប់វិស័យឯកជននៅក្នុងប្រទេស។

ឯកឧត្តមរដ្ឋលេខាធិការ បន្ថែមថា កន្លងមកក្រសួងសេដ្ឋកិច្ច និងហិរញ្ញវត្ថុ បានរៀបចំបង្កើតថ្មី កែ​សម្រួល និងបំពេញបន្ថែម នូវលិខិតបទដ្ឋានគតិយុត្តពាក់ព័ន្ធ នឹងលទ្ធកម្មសាធារណៈ សម្រាប់​គាំទ្រ​ដល់​ការអនុវត្តច្បាប់ស្តីពីលទ្ធកម្មសាធារណៈ ឆ្នាំ២០២៣ ព្រម ទាំងបានដាក់ឱ្យ​អនុវត្ត​នូវ​លិខិត​បទដ្ឋាន​គតិយុត្តទាំងនេះជាបន្តបន្ទាប់។ ដើម្បីបន្តគាំទ្រដល់ការ​អនុវត្ត​ច្បាប់​ស្តីពី​លទ្ធកម្ម​សាធារណៈ, ក្រសួងសេដ្ឋកិច្ច និងហិរញ្ញវត្ថុ បានរៀបចំសេចក្តីព្រាងប្រកាសស្តីពីលទ្ធកម្ម តាមរយៈ​ការ​ផ្តល់ប្រព្រឹត្តិកម្មអនុគ្រោះ ក្នុងគោលបំណង ដើម្បីលើកស្ទួយសហគ្រាសធុនមីក្រូ សហ​គ្រាស​ធុនតូច និងមធ្យម និងសហគ្រិនភាព ដែលរួមចំណែកដល់ការបង្កើតឱកាសការងារ ក្នុង​ស្រុក ការលើកកម្ពស់ផលិតភាព ការបង្កើតគំនិតច្នៃប្រឌិត និងនវានុវត្តន៍ ការពង្រឹង​សមត្ថភាព​ប្រកួតប្រជែងរបស់កម្ពុជា នៅក្នុង ទីផ្សារតំបន់និងសកល ជាពិសេសរួមចំណែក​អភិវឌ្ឍ​វិស័យ​ឯកជន និងការងារដែលជារបៀបវារៈគោលនយោបាយសំខាន់ សម្រាប់ជំរុញ កំណើន នៅក្នុងបរិការណ៍នៃដំណើរការបរិវត្តកម្មសង្គម-សេដ្ឋកិច្ចកម្ពុជា។

ចំណែក, ឯកឧត្តម ឈឹម សារ៉េត ប្រតិភូរាជរដ្ឋាភិបាលទទួលបន្ទុកជាអគ្គនាយក នៃអគ្គ​នាយក​ដ្ឋាន​លទ្ធ​កម្មសាធារណៈ លើក ឡើងឱ្យដឹងផងដែរថា ច្បាប់ស្ដីពីលទ្ធកម្មសាធារណៈ ដែលត្រូវ​បាន​ប្រកាស​ឱ្យ​ប្រើដោយព្រះរាជក្រម ថ្ងៃទី១៦ ខែឧសភា ឆ្នាំ២០២៣ គឺមានគោល​បំណង​ដើម្បី​ធានាបា​ននូ​វភាពជឿទុកចិត្ត តម្លាភាពប្រសិទ្ធភាព ការប្រកួតប្រជែង និងការសន្សំសំចៃ ព្រមទាំ​ង​ស្រប​តាម ឧត្តមានុវត្តន៍អន្តរជាតិ ដោយប្រែក្លាយតួនាទីរបស់ក្រសួងសេដ្ឋកិច្ច និងហិរញ្ញវត្ថុ ទៅជា​និយ័តករ និងជាអ្នកធ្វើសវនកម្មកិច្ចលទ្ធកម្ម ចំណែកក្រសួង-ស្ថាប័ន នឹងត្រូវបាន​ផ្តល់​សិទ្ធិអំ​ណាច និងការទទួលខុសត្រូវ ជាមួយនឹងគណនេយ្យភាពពេញលេញ ក្នុងការអនុវត្តកិច្ច លទ្ធកម្ម​របស់​ខ្លួន​។ ច្បាប់ស្តីពីលទ្ធកម្មសាធារណៈបានកំណត់នូវគោលការណ៍សំខាន់ៗជាច្រើន ដែលក្នុង​នោះ​ក៏​មានការផ្តល់ប្រព្រឹត្តិកម្ម អនុគ្រោះ ចំពោះផលិតផលក្នុងស្រុក និងអ្នកដេញថ្លៃ​ក្នុង​ស្រុក​ផង​ដែរ​។

ដើម្បីគាំទ្រដល់ការអនុវត្តច្បាប់ស្ដីពីលទ្ធកម្មសាធារណៈ និង​អនុវត្ត​តាម​ការ​ណែនាំ​ដ៏​ខ្ពង់​ខ្ពស់​របស់​សម្តេច​មហា​បវរធិបតី ហ៊ុន ម៉ាណែត នាយករដ្ឋមន្ត្រី, អគ្គនាយកដ្ឋានលទ្ធកម្មសាធារណៈ ក្នុង​នាម​ជា​​សេនាធិការក្រសួងសេដ្ឋកិច្ច និងហិរញ្ញវត្ថុ បានរៀបចំសេចក្តី ព្រាងប្រកាសស្តីពីលទ្ធកម្ម តាមរយៈការផ្តល់ប្រព្រឹត្តិកម្មអនុគ្រោះ។ ប្រកាសនេះមានកំណត់អំពីលក្ខខណ្ឌ និងនីតិវិធី​វាយ​តម្លៃ សម្រាប់ការផ្តល់ប្រព្រឹត្តិកម្មអនុគ្រោះចំពោះផលិតផលក្នុងស្រុក និងអ្នកដេញថ្លៃក្នុងស្រុក ក្នុង​គោលបំណងដើម្បីគាំទ្រដល់ការអភិវឌ្ឍ និងពង្រីក វិស័យឧស្សាហកម្ម​ក្នុង​ព្រះរាជា​ណា​ចក្រ​កម្ពុជា​ ដោយលើកទឹកចិត្តដល់ក្រុមហ៊ុន សហគ្រាស ឬរូបវន្តបុគ្គលក្នុងស្រុកឱ្យចូលរួមដេញថ្លៃ ដើ​ម្បី​ផ្គត់​ផ្គង់ទំនិញ អនុវត្តការងារសំណង់ ផ្តល់សេវាកម្ម ឬផ្តល់សេវាទីប្រឹក្សា ជូនស្ថាប័ន​អនុវត្ត​លទ្ធកម្ម៕ អត្ថបទ៖ សុន រ៉ាឌី