យោងតាមប្រភពបីបានឱ្យដឹងថា ផែនការរបស់របបយោធាដែលកំពុងកាន់អំណាចនៅសហភាពមីយ៉ាន់ម៉ាក្នុងការរៀបចំការបោះឆ្នោតស្របពេលមានការប្រយុទ្ធគ្នាយ៉ាងខ្លាំងក្លា ត្រូវគេរំពឹងថានឹងត្រូវបានពិភាក្សាក្នុងកិច្ចពិភាក្សានៅថ្ងៃព្រហស្បតិ៍១៩ធ្នូនេះ រវាងរដ្ឋមន្ត្រីការបរទេសរបស់ខ្លួន និងសមភាគីមកពីប្រទេសជិតខាង។

ប្រទេសថៃកំពុងធ្វើជាម្ចាស់ផ្ទះនៃកិច្ចប្រជុំថ្នាក់តំបន់ពីរដាច់ដោយឡែកពីគ្នាលើវិបត្តិមីយ៉ាន់ម៉ាក្នុងសប្តាហ៍នេះ ជាលើកដំបូង ដែលមានការចូលរួមពីប្រទេសមួយចំនួន រួមទាំងប្រទេសចិន បង់ក្លាដែស និងឥណ្ឌា ហើយក្រោយមកមានសមាជិកមួយនៃប្លុកតំបន់អាស៊ាន នឹងចូលរួមដែរ។    

កិច្ចពិភាក្សានេះធ្វើឡើងស្របពេលម៉ាឡេស៊ីនៅឆ្នាំក្រោយចូលកាន់តំណែងជាប្រធាននៃសមាគមប្រជាជាតិអាស៊ីអាគ្នេយ៍ ឬអាស៊ាន មានសមាជិក១០ប្រទេស ដែលបានបរាជ័យក្នុងការអនុវត្តផែនការសន្តិភាពក្នុងសហភាពមីយ៉ាន់ម៉ា ជាទីដែលជម្លោះកាន់តែធ្ងន់ធ្ងរ កំពុងប៉ះពាល់ដល់បណ្ដាប្រទេសជិតខាងផងដែរ។

មីយ៉ាន់ម៉ាបានធ្លាក់ក្នុងភាពចលាចលចាប់តាំងពីដើមឆ្នាំ២០២១ នៅពេលរបបយោធាបានផ្តួលរំលំរដ្ឋាភិបាលស៊ីវិលជាប់ឆ្នោតមួយ ហើយបានបង្ក្រាបលើការតវ៉ាគាំទ្រលទ្ធិប្រជាធិបតេយ្យបង្កឱ្យមានការបះបោរប្រដាប់អាវុធទូទាំងប្រទេសកាន់តែខ្លាំងដល់បច្ចុប្បន្ន។

ទោះរងការបាត់បង់យ៉ាងដំណំជួរសមរភូមិមុខជាច្រើន ប្រឈមសេដ្ឋកិច្ចដួលរលំ និងគណបក្សនយោបាយរាប់សិបត្រូវបានហាមប្រាមក៏ដោយ ក៏របបយោធាកំពុងជំរុញឱ្យរៀបចំការបោះឆ្នោតនៅឆ្នាំ ២០២៥ដែរ ដែលត្រូវបានចំអកយ៉ាងទូលំទូលាយថាជាការបោកប្រាស់ដោយក្រុមអ្នករិះគន់។ប្រភពបីដឹងផ្នែកការទូតក្នុងតំបន់បាននិយាយថា បញ្ហានេះត្រូវគេរំពឹងថានឹងលើកឡើងក្នុងកិច្ចពិភាក្សាក្នុងទីក្រុងបាងកកនៅថ្ងៃព្រហស្បតិ៍នេះ ដោយមានចូលរួមដោយរដ្ឋមន្ត្រីការបរទេសតែងតាំងដោយរបបយោធាមីយ៉ាន់ម៉ា លោក តាន ស្វេ(Than Swe) ៕