​

សភាជាន់ទាបរបស់ប្រទេសហ្វីលីពីន បានផ្តល់អនុសាសន៍ដាក់ការចោទប្រកាន់ពីបទឧក្រិដ្ឋកម្មប្រឆាំងមនុស្សជាតិ ទៅលើអតីតប្រធានាធិបតី លោក Rodrigo Duterte និងមន្ត្រីនគរបាល ជុំវិញការបង្ក្រាបយ៉ាងតឹងរ៉ឹងលើគ្រឿងញៀនខុសច្បាប់។

រដ្ឋាភិបាលប្រទេសហ្វីលីពីន បាននិយាយថា មនុស្សជាង៦.០០០នាក់ ត្រូវបានសម្លាប់នៅក្នុងការបង្ក្រាប ដែលត្រូវបានគេស្គាល់ថា «សង្គ្រាមប្រឆាំងគ្រឿងញៀន»។ 

សាច់ញាតិរបស់អ្នកស្លាប់ អះអាងថា រដ្ឋ បានសម្លាប់មនុស្សក្រៅប្រព័ន្ធតុលាការ។

សភាទាំងពីរ បានបើកការស៊ើបអង្កេត និងបើកសវនាការ។ គណៈកម្មាធិការសភាជាន់ទាប បានប្រកាសកាលពីថ្ងៃពុធថា ខ្លួនបានចងក្រងរបាយការណ៍អំពីការរកឃើញនេះ។ 

គណៈកម្មាធិការបាននិយាយថា យុទ្ធនាការរបស់រដ្ឋបាល លោក Duterte បានធ្វើឲ្យមនុស្សជាង៣០.០០០នាក់ក្លាយជាជនរងគ្រោះពីការសម្លាប់នៅក្រៅប្រព័ន្ធតុលាការ។

គណៈកម្មការ បានផ្តល់អនុសាសន៍ឱ្យមានការចោទប្រកាន់ពីបទឧក្រិដ្ឋកម្មប្រឆាំងមនុស្សជាតិ លើលោកDuterte សមាជិកព្រឹទ្ធសភាដែលជាជំនួយការជិតស្និទ្ធរបស់លោកDuterte អតីតអធិការនគរបាលជាតិ និងមន្ត្រីផ្សេងទៀត។

លោក Duterte បាននិយាយក្នុងសវនាការថា លោកទទួលខុសត្រូវតាមផ្លូវច្បាប់ពេញលេញសម្រាប់យុទ្ធនាការនេះ។ ប៉ុន្តែលោក ក៏បានបញ្ជាក់ពីការបង្រ្កាប ដោយបាននិយាយថា លោកធ្វើអ្វីដែលលោកត្រូវតែធ្វើ ដើម្បីប្រទេសរបស់លោក។