ប្រធានាធិបតីអ៊ុយក្រែន លោក Volodymyr Zelenskiy នៅថ្ងៃព្រហស្បតិ៍ (ទី១៩ ខែធ្នូ) នេះ បានជំរុញឲ្យលោក Donald Trump រួបរួមជាមួយអឺរ៉ុប ដើម្បីបញ្ឈប់ប្រទេសរុស្ស៊ី និងជួយសង្គ្រោះប្រទេសរបស់លោក ចំពេលមានការភ័យខ្លាចថា អ្នករិះគន់អង្គការណាតូ (NATO) គឺប្រធានាធិបតីជាប់ឆ្នោតរបស់សហរដ្ឋអាមេរិក អាចបង្កជាឧបសគ្គដល់ទីក្រុងគីវ ដោយកាត់បន្ថយការគាំទ្ររបស់អាមេរិក សម្រាប់កិច្ចប្រឹងប្រែងធ្វើសង្គ្រាមរបស់ខ្លួន។

មុនពេលថ្លែងទៅកាន់បណ្ដាមេដឹកនាំសហភាពអឺរ៉ុប (EU) នៅពេលចាប់ផ្តើមកិច្ចប្រជុំកំពូលរបស់ EU ដែលគ្រប់ដណ្ដប់ដោយបញ្ហាសង្រ្គាមអ៊ុយក្រែនដែលលោក Trump បានប្តេជ្ញាថា នឹងបញ្ចប់នោះ លោក Zelenskiy បានលើកឡើងថា៖ «យើងត្រូវការការរួបរួមយ៉ាងខ្លាំងក្លា រវាងសហរដ្ឋអាមេរិក និង EU រួមជាមួយនឹងបណ្តាប្រទេសអឺរ៉ុបផ្សេងទៀត»។

ដោយសំដៅទៅលើប្រធានាធិបតីរុស្ស៊ីលោក Vladimir Putin លោក Zelenskiy បានបន្តថា៖ «យើងត្រូវការការរួបរួមនេះ ដើម្បីសម្រេចបានសន្តិភាព។ ខ្ញុំគិតថា មានតែសហរដ្ឋអាមេរិក និងអឺរ៉ុប រួមគ្នាប៉ុណ្ណោះ ទើបអាចបញ្ឈប់លោក Putin និងជួយសង្គ្រោះអ៊ុយក្រែនបាន»។

គួរបញ្ជាក់ថា អ្នកការទូតសហភាពអឺរ៉ុប បាននិយាយថា មេដឹកនាំទាំងអស់មានបំណងបញ្ជូនសញ្ញាច្បាស់ៗ ទៅលោក Trump អំពីការបន្តការគាំទ្ររបស់ប្លុក ចំពោះអ៊ុយក្រែន ហើយនឹងសង្កត់ធ្ងន់ថា ដំណោះស្រាយសន្តិភាពណាមួយត្រូវតែពាក់ព័ន្ធនឹងអ៊ុយក្រែន និងគោរពបូរណភាពដែនដីប្រទេសនេះ»៕