ជនជាតិប៉ាឡេស្ទីន សញ្ជាតិអាមេរិក ៩នាក់ បានប្តឹងរដ្ឋាភិបាលសហរដ្ឋអាមេរិក កាលពីថ្ងៃព្រហស្បតិ៍ (១៩ ធ្នូ) ដោយចោទប្រកាន់ថា ទីក្រុងវ៉ាស៊ីនតោន បានបរាជ័យក្នុងការជួយសង្គ្រោះពួកគេ ឬសមាជិកនៃគ្រួសាររបស់ពួកគេ ដែលបានជាប់គាំងនៅក្នុងដែនដីហ្កាហ្សា ជាទីដែលសង្រ្គាមរបស់អ៊ីស្រាអែល បានសម្លាប់មនុស្សរាប់ម៉ឺននាក់ និងបណ្តាលឱ្យមានវិបត្តិមនុស្សធម៌។

បណ្តឹងនេះចោទប្រកាន់ក្រសួងការបរទេសអាមេរិក ពីបទរើសអើងប្រឆាំងជនជាតិអាមេរិកដើមកំណើតប៉ាឡេស្ទីន ដោយបោះបង់ពួកគេចោលនៅក្នុងតំបន់សង្គ្រាម ហើយមិនបានប្រឹងប្រែងជួយជម្លៀសអ្នកទាំងនោះ ដូចដែលខ្លួនបានធ្វើលើជនជាតិអាមេរិក ដែលមានដើមកំណើតពីកន្លែងផ្សេងនោះទេ។

នេះជាបណ្ដឹងទីពីរហើយប្រឆាំងនឹងរដ្ឋាភិបាលក្នុងសប្តាហ៍នេះ បន្ទាប់ពីជនជាតិប៉ាឡេស្ទីនមួយក្រុមបានប្តឹងក្រសួងការបរទេសអាមេរិកកាលពីថ្ងៃអង្គារសប្ដាហ៍នេះ ជុំវិញការគាំទ្ររបស់ទីក្រុងវ៉ាស៊ីនតោន ចំពោះយោធាអ៊ីស្រាអែល។

អ្នកនាំពាក្យក្រសួងការបរទេសនិយាយថា ក្រសួងមិនធ្វើអត្ថាធិប្បាយលើវិវាទដែលមិនទាន់ដាច់ស្រេចនោះទេ ប៉ុន្តែបានសង្កត់ធ្ងន់ថា សន្តិសុខ និងសុវត្ថិភាពរបស់ពលរដ្ឋអាមេរិកជុំវិញពិភពលោកគឺជា "អាទិភាពចម្បង" របស់រដ្ឋាភិបាល៕