មន្ទីរបញ្ចកោណ បាននិយាយកាលពីថ្ងៃព្រហស្បតិ៍ថា សហរដ្ឋអាមេរិក បានបង្កើនចំនួនកងទ័ពទ្វេដងដែលខ្លួនមាននៅក្នុងប្រទេសស៊ីរី ជាផ្នែកនៃប្រតិបត្តិការប្រឆាំងក្រុមសកម្មប្រយុទ្ធរដ្ឋអ៊ីស្លាម រហូតដល់ប្រហែល២.០០០នាក់។

រដ្ឋាភិបាលទីក្រុងវ៉ាស៊ីនតោន បាននិយាយថា ខ្លួនធ្លាប់មានបុគ្គលិកយោធាប្រហែល៩០០នាក់នៅក្នុងប្រទេសស៊ីរី ជាផ្នែកមួយនៃកិច្ចខិតខំប្រឹងប្រែងអន្តរជាតិប្រឆាំងក្រុមជីហាដ ដែលបានដណ្តើមយកទឹកដីជាច្រើននៅទីនោះ និងនៅក្នុងប្រទេសអ៊ីរ៉ាក់ដែលនៅជិតខាង មុនពេលត្រូវបានកម្ចាត់ដោយកងកម្លាំងក្នុងស្រុកដែលគាំទ្រដោយយុទ្ធនាការតាមអាកាសដឹកនាំដោយសហរដ្ឋអាមេរិក។

ប៉ុន្តែបច្ចុប្បន្ននេះមាន ទាហានអាមេរិកប្រហែល២.០០០នាក់នៅក្នុងប្រទេសស៊ីរី ហើយមានរយៈពេលយ៉ាងហោចណាស់ពីរទៅបីខែ ដែលអ្នកនាំពាក្យមន្ទីរបញ្ចកោណ ឧត្តមសេនីយ ផាត រ៉ៃឌ័រ(Pat Ryder) បានប្រាប់អ្នកសារព័ត៌មានដោយនិយាយថា លោកទើបតែទទួលបានតួលេខដែលបានធ្វើបច្ចុប្បន្នភាព។

លោក Ryder បាននិយាយដោយសំដៅដល់បេសកកម្មកម្ចាត់ក្រុមរដ្ឋឥស្លាមថា «ចំនួនបន្ថែម ត្រូវបានចាត់ទុកថាជាកងកម្លាំងបណ្តោះអាសន្ននៅទីនោះ ដើម្បីគាំទ្រដល់កងកម្លាំង ដែលត្រូវបានដាក់ពង្រាយនៅទីនោះរយៈពេលវែង។

ទីក្រុងវ៉ាស៊ីនតោន បាននិយាយផងដែរថា ខ្លួនមានទាហានប្រហែល២.៥០០នាក់ នៅក្នុងប្រទេសអ៊ីរ៉ាក់ រយៈពេលជាច្រើនឆ្នាំមកហើយ ដែលបានធ្វើការវាយប្រហារ និងវាយឆ្មក់តាមកាលកំណត់ ដើម្បីជួយទប់ស្កាត់ការកើតឡើងវិញនៃក្រុមសកម្មប្រយុទ្ធរដ្ឋអ៊ីស្លាម។