មន្ត្រីជាន់ខ្ពស់សេតវិមានម្នាក់ បាននិយាយកាលថ្ងៃព្រហស្បតិ៍ថា ប្រទេសប៉ាគីស្ថានប្រដាប់ដោយអាវុធនុយក្លេអ៊ែរ កំពុងអភិវឌ្ឍន៍សមត្ថភាពមីស៊ីលបាលីស្ទីករយៈចម្ងាយឆ្ងាយ ដែលនៅទីបំផុត អាចអនុញ្ញាតឲ្យប្រទេសនេះ វាយប្រហារគោលដៅនានាហួសពីអាស៊ីខាងត្បូងទៅទៀត ដោយបង្កការគំរាមកំហែងចំពោះសហរដ្ឋអាមេរិក។

ការបង្ហាញឲ្យដឹងដ៏គួរឲ្យភ្ញាក់ផ្អើលរបស់ទីប្រឹក្សាសន្តិសុខជាតិរងលោក Jon Finer បានគូសបញ្ជាក់ថាតើទំនាក់ទំនងជិតស្និទ្ធរវាងទីក្រុងវ៉ាស៊ីនតោន និងទីក្រុងអ៊ីស្លាម៉ាបាដ បានធ្លាក់ចុះ ចាប់តាំងពីសហរដ្ឋអា   មេរិក បានដកងទ័ពចេញពីអាហ្វហ្គានីស្ថាន ក្នុងឆ្នាំ ២០២១។

បញ្ហានេះ ក៏ត្រូវបានចោទជាសំណួរថាតើប៉ាគីស្ថានបានផ្លាស់ប្តូរទិសដៅនៃកម្មវិធីអាវុធនុយក្លេអ៊ែរ និងកម្មវិធីមីស៊ីលបាលីស្ទីក មានគោលបំណងប្រឆាំងនឹងប្រទេសឥណ្ឌាជាយូរយារណាស់មកហើយឬយ៉ាង   ណា ដោយខ្លួនបានធ្វើសង្គ្រាមធំចំនួនបី ចាប់តាំងពីឆ្នាំ ១៩៤៧។

ថ្លែងទៅកាន់អង្គការ Carnegie Endowment for International Peace លោក Finer បាននិយាយថា ប្រទេសប៉ាគីស្ថាន បានបន្ត«បច្ចេកវិទ្យាមីស៊ីលកាន់តែទំនើប ចាប់ពីប្រព័ន្ធមីស៊ីលបាលីស្ទីករយៈចម្ងាយឆ្ងាយ រហូតដល់ឧបករណ៍ដែលនឹងអនុញ្ញាតឲ្យមានការសាកល្បងម៉ូទ័រជំរុញរ៉ូកែតធំជាងនេះ។

ប្រសិនបើនិន្នាការទាំងនោះ នៅតែបន្ត លោក Finer បានបញ្ជាក់ថា៖«ប៉ាគីស្ថាន នឹងមានសមត្ថភាពវាយប្រហារគោលដៅហួសពីអាស៊ីខាងត្បូង រួមទាំងនៅសហរដ្ឋអាមេរិកផងដែរ»។