ប្រជាជនប៉ាឡេស្ទីន នៅថ្ងៃសុក្រ (ទី២០ ខែធ្នូ) នេះ បាននិយាយថា អ្នកតាំងលំនៅជនជាតិអ៊ីស្រាអែលបានបង្កឲ្យមានអគ្គិភ័យ នៅវិហារអ៊ិស្លាមមួយ ក្នុងតំបន់កាន់កាប់ West Bank ហើយរូបភាបវីដេអូ បានបង្ហាញឲ្យឃើញពីពាក្យ «សងសឹក» «ស្លាប់ទៅជនអារ៉ាប់» និងពាក្យស្លោកផ្សេងទៀត ដែលត្រូវបានបាញ់ថ្នាំសរសេរជាភាសាហេព្រើរនៅផ្នែកខាងមុខអាគារ។

ស្នាមដុតឆេះពណ៌ខ្មៅ ត្រូវបានគេមើលឃើញនៅច្រកចូលទៅកាន់ទីកន្លែងពិសិដ្ឋរបស់អ្នកកាន់សាសនាអ៊ិស្លាម នៅភូមិ Marda ភាគខាងជើងនៃតំបន់ West Bank។ អគ្គិភ័យនោះត្រូវបានពន្លត់មុនពេលដែលវាអាចរាលដាលកាន់តែខ្លាំង។ នគរបាលអ៊ីស្រាអែលបាននិយាយថា ពួកគេកំពុងប្រមូលសក្ខីកម្ម និងភស្តុតាង នៅកន្លែងកើតហេតុ។

លោក Nasfat al-Khufash ប្រធានក្រុមប្រឹក្សាភូមិ Marda បាននិយាយថា៖ «នៅថ្ងៃសុក្រនេះ ភូមិ Marda បានភ្ញាក់ពីដំណេកមកត្រូវជួបនឹងភាពតក់ស្លុត ដោយការវាយប្រហារភេរវកម្មជាប្រព័ន្ធពីសំណាក់ក្រុមអ្នកតាំងលំនៅដែលបានដុតបំផ្លាញវិហារអ៊ិស្លាម Bir al-Walideen»។ លោកបានបន្ថែមថា៖ «ការវាយប្រហារទាំងនេះដោយក្រុមអ្នកតាំងទីលំនៅ កំពុងបន្តមាន និងត្រូវបានធ្វើជាប្រព័ន្ធ»។

ចំណែកនគរបាលអ៊ីស្រាអែល និងសេវាសន្តិសុខ Shin Bet បានឲ្យដឹងនៅក្នុងសេចក្តីថ្លែងការណ៍រួមមួយថា៖ «យើងមើលឃើញថា ឧបទ្ទវហេតុនេះ គឺធ្ងន់ធ្ងរខ្លាំងបំផុត ហើយយើងនឹងចាត់វិធានការយ៉ាងម៉ឺងម៉ាត់ ដើម្បីនាំជនល្មើសមកកាត់ទោស ដោយមានការកាត់ទោសយ៉ាងតឹងរ៉ឹង»។

ស្ថាប័នការបរទេសរបស់អាជ្ញាធរប៉ាឡេស្ទីន បានចាត់ទុកហេតុការណ៍នេះថា ជាការវាយប្រហារចុងក្រោយបង្អស់ ក្នុងចំណោមការរំលោភបំពាន និងអំពើឧក្រិដ្ឋកម្មជាច្រើនពីសំណាក់អ្នកតាំងលំនៅអ៊ីស្រាអែល ហើយបានអំពាវនាវឲ្យក្រុមប្រឹក្សាសន្តិសុខអង្គការសហប្រជាជាតិជួយការពារប្រជាជនប៉ាឡេស្ទីន៕