អធិការបតីអាល្លឺម៉ង់ លោក អូឡាហ្វ សូល (Olaf Scholz) កាលពីថ្ងៃសៅរ៍ ទី២១ ធ្នូ បានថ្កោលទោសការវាយប្រហារដោយការបើករថយន្តបំបុកចូលហ្វូងមនុស្សដ៏គួរឱ្យភ័យខ្លាច និងគ្មានវិចារណញ្ញាណលើផ្សារបុណ្យណូអែលមានមនុស្សដ៏ច្រើនកុះករ ដែលបានសម្លាប់មនុស្ស ៥នាក់ និងជាង២០០នាក់ផ្សេងទៀតបានរងរបួស។

នគរបាលបានចាប់ខ្លួនវេជ្ជបណ្ឌិតផ្នែកវិកលចរិតជនជាតិអារ៉ាប៊ីសាអ៊ូឌីតវ័យ៥០ឆ្នាំម្នាក់នៅកន្លែងកើតហេតុកាលពីថ្ងៃសុក្រសប្ដាហ៍នេះនៅក្បែររថយន្ត SUV ដែលត្រូវបានប្រើបើកបំបុកហ្វូងមនុស្សនៅផ្សារបុណ្យណូអែលដោយបន្សល់ទុកនូវដាននៃការសម្លាប់រង្គាល និងថ្លុកឈាម។

លោកអូឡាហ្វ សូល ស្ថិតក្នុងសម្លៀកបំពាក់ពណ៌ខ្មៅត្រូវបានចូលរួមដោយអ្នកនយោបាយជាតិ និងតំបន់ និងកងកម្លាំងការពារសុវត្ថិភាពនៅក្នុងទីក្រុង ម៉ែកដេប៊ើក (Magdeburg) ភាគខាងកើត ជាទីដែលពួកគេបានដាក់ផ្កានៅខាងក្រៅព្រះវិហារដ៏ធំមួយ។

អធិការបតីរូបនេះបាននិយាយថាអ្នករបួសយ៉ាងហោចណាស់៤០នាក់ស្ថិតក្នុងស្ថានភាពមួយគួរឲ្យព្រួយបារម្ភ ប៉ុន្តែពុំបានផ្តល់ព័ត៌មានលម្អិតទេ។

ស្របពេលដែលប្រទេសអាល្លឺម៉ង់ មានការតក់ស្លុតយ៉ាងខ្លាំងពីការវាយប្រហារដែលបានកើតឡើងរយៈពេល ៨ ឆ្នាំ បន្ទាប់ពីការវាយប្រហាររបស់ពួកជីហាដក្នុងផ្សារបុណ្យណូអែលនៅទីក្រុងប៊ែរឡាំងបានសម្លាប់មនុស្ស១៣ នាក់នោះ ព័ត៌មានលម្អិតបន្ថែមទៀតបានលេចចេញអំពីបុរសអារ៉ាប៊ីសាអ៊ូឌីតដែលកំពុងត្រូវបានចាប់ខ្លួន។

ជនសង្ស័យរូបនេះមានឈ្មោះថា Taleb Jawad Al Abdulmohsen រស់នៅក្នុងប្រទេសអាល្លឺម៉ង់ចាប់តាំងពីឆ្នាំ២០០៦មក និងមានការអនុញ្ញតឲ្យរស់នៅជាអចិន្ត្រៃយ៍ បម្រើការនៅក្លីនិកមួយជិតទីក្រុងម៉ែកដេប៊ើក៕