ក្រុមមន្ត្រីបាននិយាយថា មនុស្សយ៉ាងហោចណាស់៣៨នាក់បានស្លាប់ក្នុងគ្រោះថ្នាក់ចរាចរណ៍រថយន្តក្រុងនៅភាគអាគ្នេយ៍ប្រទេសប្រេស៊ីលកាលពីថ្ងៃសៅរ៍ ២១ ធ្នូ ជាអ្វីដែលលោកប្រធានាធិបតី ល្វីស អ៊ីណាស៊ីយ៉ូ លូឡា ដា ស៊ីលវ៉ា (Luiz Inacio Lula da Silva) ហៅថាសោកនាដកម្មដ៏គួរឱ្យភ័យខ្លាច។

យោងតាមទិន្នន័យរបស់នគរបាល ដែលដកស្រង់ដោយប្រព័ន្ធផ្សព្វផ្សាយក្នុងស្រុក ឧបទ្ទវហេតុនៅក្នុងរដ្ឋ មីណាស់ ហ្គេរ៉េស (Minas Gerais) ពាក់ព័ន្ធនឹងរថយន្តក្រុងដែលឆេះក្នុងហេតុការណ៍ការបុកគ្នា គឺជាគ្រោះថ្នាក់ដ៏អាក្រក់បំផុត ដែលគេបានមើលឃើញនៅលើផ្លូវហាយវេសហព័ន្ធរបស់ប្រទេសប្រេស៊ីលចាប់តាំងពីឆ្នាំ ២០០៧។

នៅក្នុងរបាយការណ៍ចុងក្រោយ នគរបាលស៊ីវិល បានបញ្ជាក់ពីអ្នកស្លាប់ចំនួន ៣៨នាក់ និងមនុស្ស ៨ នាក់ត្រូវបានបញ្ជូនទៅមន្ទីរពេទ្យ។

ក្រុមអ្នកពន្លត់អគ្គិភ័យបាននិយាយក្នុងព័ត៌មានបឋមថា នៅម៉ោងប្រហែល ៣ និង ៣០ នាទីទៀបភ្លឺម៉ោងក្នុងស្រុក កង់រថយន្តក្រុងបានផ្ទុះ នៅជិតក្រុង ឡាជីនហា (Lajinha) បណ្តាលឱ្យអ្នកបើកបរបាត់បង់ការគ្រប់គ្រង និងបុករថយន្តដឹកទំនិញមួយគ្រឿង។

ក្រុមមន្ត្រីបាននិយាយថា រថយន្តមួយគ្រឿងទៀតក៏បានបុករថយន្តក្រុងពីក្រោយដែរ ប៉ុន្តែអ្នកបើកបរបានរួចជីវិត៕