ភ្នំពេញ៖ ក្រុមយុវជន និងសិស្សានុសិស្សចំនួនប្រមាណជាង ៣ពាន់នាក់ មកពីតំបន់ផ្សេងៗគ្នា បានស្ម័គ្រចិត្តដើម្បីចូលរួមក្បួនដង្ហែរ “សាទរកម្ពុជា” ឬ “Celebrating Cambodia” ខណៈព្រឹត្តិការណ៍ដ៏ធំ និងអស្ចារ្យមួយនេះ គ្រោងនឹងប្រារព្ធឡើងនៅថ្ងៃទី៣១ ខែធ្នូ ឆ្នាំ២០២៤ ខាងមុខនេះ នៅទីក្រុងភ្នំពេញ។

 កំពុងចូលរួមហាត់សមក្បួនដង្ហែ “សាទរកម្ពុជា” នៅរសៀលថ្ងៃទី២២ ខែធ្នូកន្លងទៅ ស្ថិតនៅខណ្ឌសែនសុខ រាជធានីភ្នំពេញ យុវជន សុខ សាម៉ុល បច្ចុប្បន្នជានិស្សិតឆ្នាំទី៥ ខាងផ្នែកបរិញ្ញាប័ត្រជំនាញវិទ្យាសាស្រ្ត វេជ្ជសាស្រ្ត បានឲ្យព័ត៌មាន ប៊ីធីវី ថា នេះមិនមែនជាលើកដំបូងទេដែលស្ម័គ្រចិត្តចូលរួមការងារសង្គមបែបនេះ គ្រាដែលកន្លងមកបានចូលរួមដើម្បីបម្រើការងារនាមជាយុវជនស័្មគ្រចិត្តដូចគ្នា នៅក្នុងព្រឹត្តិការណ៍កីឡាស៊ីហ្គេម និងកីឡាប៉ារ៉ាហ្គេម ឆ្នាំ២០២៣កន្លងទៅ។ យុវជនរូបនេះ បានបន្តថា សម្រាប់ព្រឹត្តិការណ៍សាទរកម្ពុជា ដែលត្រៀមប្រារព្ធឡើងនាពេលខាងមុខឆាប់ៗនេះ ក៏នៅតែស្ម័គ្រចិត្តចូលរួមបន្ត ដោយសារការស្រលាញ់ប្រទេសជាតិ ជាពិសេសដើម្បីអបអរសាទរនូវអ្វីដែលកម្ពុជាមានក្នុងពេលបច្ចុប្បន្ន បើទោះបីជាហត់បន្តិច ក៏ប៉ុន្តែពិតជាសប្បាយចិត្ត និងរំភើបចិត្តខ្លាំងណាស់នៅពេលបានចូលរួមសកម្មភាពដ៏ល្អនេះ។

កញ្ញា សុភ័ណ្ឌ ដាវី ជាបុគ្គលិកក្រុមហ៊ុនមួយនៅរាជធានីភ្នំពេញ បានឲ្យ ប៊ីធីវី ដឹងដែរថា ពិតជាសប្បាយចិត្តមែនទែន ហើយកាលពីមុនពេលដែលធ្វើស្ម័គ្រចិត្តក្នុងកម្មវិធី “សាទរកម្ពុជា” ក៏ធ្លាប់ជាយុវជនស្ម័គ្រចិត្តក្នុងព្រឹត្តការណ៍កីឡាស៊ីហ្គេម និងប៉ារ៉ាហ្គេមដូចគ្នា ដូច្នេះការចូលរួមសកម្មភាពទាំងអស់នេះ ពិតជាសប្បាយរីករាយនិងចូលរួម ទោះបីជារវល់ការងារច្រើនយ៉ាងណាក្តី ក៏ឆ្លៀតនិងលះបង់ផងដែរ ដើម្បីបង្ហាញមោទនភាព ជាមួយការរក្សាបាននូវអត្តសញ្ញាណនៃប្រជាជាតិនិងប្រជាជន និងការអបអរសាទរដល់ការរួមរស់ជាមហាគ្រួសារខ្មែរតែមួយ។

 “សាទរកម្ពុជា” គឺជាព្រឹត្តិការណ៍ថ្មីមួយថែមទៀត ដែលត្រូវបានរៀបចំដោយ សហភាពសហព័ន្ធយុវជនកម្ពុជា (ស.ស.យ.ក.) ក្នុងគោលបំណងផ្សារភ្ជាប់ប្រជាជនទៅសង្គមជាតិទាំងមូល ដែលក្នុងនោះតាមរយៈការរៀបចំព្រឹត្តិការណ៍ និងកម្មវិធីនានា។ សូមបញ្ជាក់ទៀតថា ព្រឹត្តិការណ៍ “សាទរកម្ពុជា” នឹងប្រារព្ធឡើងនៅថ្ងៃទី៣១ ខែធ្នូ ឆ្នាំ២០២៤ ហើយបន្តរហូតដល់វេលាឆ្លងឆ្នាំសាកល២០២៥ ស្ថិតនៅនៅតាមសួនច្បារប្របមាត់ទន្លេចតុមុខ រហូតដល់សួនច្បារមុខប្រាសាទច័ន្ទឆាយានៃព្រះបរមរាជវាំង។ តាមរយៈព្រឹត្តិការណ៍នេះ នឹងរំពឹងថា ជាការរួមចំណែកដល់ស្មារតីនៃការលើសពីការមើលឃើញទង់ជាតិ លើសពីការស្គាល់លឺភ្លេងជាតិ និងលើសពីការក្រោកឈរគោរពទង់ជាតិ តែជាការផ្សារភ្ជាប់មនោសញ្ចេតនាទៅកាន់ទង់ជាតិកម្ពុជា ដោយការរួបរួម សាមគ្គី ឯកភាព ទៅជាកម្លាំងជាតិតែមួយក្រោមទង់នៃប្រជាជាតិ “ទង់នៃព្រះរាជាណាចក្រកម្ពុជា” ៕អត្ថបទ ឈិត បូរ៉ាវី