ប្រទេសចិន បានរិះគន់ជំនួយយោធាថ្មីរបស់សហរដ្ឋអាមេរិក ដល់កោះតៃវ៉ាន់ កាលពីថ្ងៃអាទិត្យ (២២ ធ្នូ) ដោយនិយាយថា កញ្ចប់ជំនួយ ៥៧១ លានដុល្លារនេះ បានរំលោភយ៉ាងធ្ងន់ធ្ងរលើ "គោលការណ៍ចិនតែមួយ" និងបទប្បញ្ញត្តិនៃសេចក្តីថ្លែងការណ៍រួមរវាងប្រទេសចិន និងសហរដ្ឋអាមេរិក។

អ្នកនាំពាក្យក្រសួងការបរទេសចិនបាននិយាយថា ទីក្រុងប៉េកាំង នឹងចាត់វិធានការចាំបាច់ទាំងអស់ដើម្បីការពារអធិបតេយ្យភាព និងបូរណភាពទឹកដីរបស់ខ្លួន ដោយព្រមានថា កោះតៃវ៉ាន់ គឺជា "បន្ទាត់ក្រហមដែលមិនត្រូវឆ្លងកាត់ឡើយ" នៅក្នុងទំនាក់ទំនងរវាងចិន-អាមេរិក។

រដ្ឋាភិបាលចិន បានចាត់ទុកកោះស្វ័យគ្រប់គ្រងតៃវ៉ាន់ ថាជាទឹកដីរបស់ខ្លួន ដោយនេះជាការអះអាងសិទ្ធិដែលរដ្ឋាភិបាលទីក្រុងតៃប៉ិ ជំទាស់យ៉ាងខ្លាំង។

សហរដ្ឋអាមេរិក មានចំណងផ្លូវច្បាប់ក្នុងការផ្តល់ឱ្យកោះតៃវ៉ាន់នូវមធ្យោបាយការពារខ្លួន ហើយការលក់សព្វាវុធជារឿយៗរបស់ទីក្រុងវ៉ាស៊ីនតោនទៅឱ្យទីក្រុងតៃប៉ិ បានធ្វើឱ្យប្រទេសចិន ខឹងសម្បារយ៉ាងខ្លាំង៕