កិច្ចព្រមព្រៀងបទឈប់បាញ់ និងការដោះលែងចំណាប់ខ្មាំងរវាងអ៊ីស្រាអែល និងក្រុមហាម៉ាស បានបញ្ចប់៩០%ហើយដែលក្នុងនោះមាន៣ដំណាក់កាល នេះបើយោងតាមរបាយការណ៍របស់ទូរទស្សន៍ BBC កាលពីថ្ងៃអាទិត្យ។

ប្រព័ន្ធផ្សព្វផ្សាយអេហ្ស៊ីបបាននិយាយថា ចំណាប់ខ្មាំងអ៊ីស្រាអែល ៣៤ នាក់ នឹងត្រូវដោះលែងក្នុងដំណាក់កាលដំបូងនៃកិច្ចព្រមព្រៀង ទោះបីជាអង្គការភេរវករកំពុងទាមទារលក្ខខណ្ឌបន្ថែមសម្រាប់ទាហានប្រុសរបស់ខ្លួន ដែលត្រូវបានឃុំខ្លួននៅអ៊ីស្រាអែលក៏ដោយ។

មន្ត្រីជាន់ខ្ពស់អ៊ីស្រាអែលម្នាក់បាននិយាយថា ទីក្រុងហ្សេរុយសាឡឹមបានទទួលសញ្ញានៅមានជីវិត ពីចំណាប់ខ្មាំង នេះបើយោងតាមរបាយការណ៍នៅក្នុងសារព័ត៌មាន Times of Israel ។

បញ្ហាសំខាន់ៗរួមមានបញ្ជីឈ្មោះចំណាប់ខ្មាំងដែលគ្រោងនឹងដោះលែង ក៏ដូចជាអ្នកដែលនៅរស់ និងស្លាប់ ទោះបីជាក្រុមហាម៉ាសបាននិយាយថា ខ្លួនមិនដឹងថាចំណាប់ខ្មាំងម្នាក់ៗ ដែលបានចាប់ ក្នុងការវាយលុកភេរវកម្មថ្ងៃទី ៧ ខែតុលា ២០២៣ កំពុងត្រូវបានឃុំខ្លួន នៅកន្លែងណាក៏ដោយ។

បញ្ហាមួយទៀតគឺសំណួរអំពីវត្តមានរបស់កងទ័ពអ៊ីស្រាអែលនៅក្នុងតំបន់ហ្កាហ្សាស្ទ្រីប ខណៈក្រុមហាម៉ាសត្រូវគេរាយការណ៍ថាទាមទារឱ្យទាហាន IDF ទាំងអស់ចាកចេញ។ ផ្ទុយទៅវិញ កងទ័ពអ៊ីស្រាអែល តាមសេចក្តីរាយការណ៍នឹងបន្តឈរជើងនៅក្នុងច្រករបៀង ណេតហ្សារឹម (Netzarim) និង ហ្វីឡាដេលផ្យា (Philadelphia) សម្រាប់រយៈពេលនៃបទឈប់បាញ់ ជាមួយនឹងការដកខ្លួនដែលគ្រោងទុកសម្រាប់ដំណាក់កាលក្រោយៗទៀត នៅពេលដែលអាជ្ញាធរស៊ីវិលចូលកាន់កាប់តំបន់ប៉ាឡេស្ទីនដែលត្រូវបានអ៊ីស្រាអែលឡោមព័ទ្ធមួយនេះ៕