សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានបញ្ជាជាថ្មីម្តងទៀត ឱ្យអាជ្ញាធរមានសមត្ថកិច្ច គ្រប់រាជធានី-ខេត្តទាំងអស់បន្តបង្រ្កាបក្រុមក្មេងទំនើងឲ្យអស់ ជាពិសេសគឺក្រុមកាប់ចាក់តែម្តង ដោយពួកគេទាំងនេះ នៅតែបង្ករអសន្តិសុខសង្គម និងបង្ករគ្រោះថ្នាក់ដល់ភ្ញៀវជាតិ និងអន្តរជាតិជាដើមនោះ។

ថ្លែងក្នុងឱកាសអញ្ជើញសំណេះសំណាលជាមួយសិស្សនិទ្ទេស A និងសិស្សប្រឡងសញ្ញាបត្រ​បច្ចេកទេស និងវិជ្ជាជីវៈកម្រិត៣ នាថ្ងៃទី២៣ ខែធ្នូ ឆ្នាំ២០២៤នេះ សម្តេចធិបតី ហ៊ុន ម៉ាណែត នាយករដ្ឋមន្រ្តី បានថ្លែងថា ក្នុងនាមជានាយករដ្ឋមន្រ្តី សូមបញ្ជាទៅអភិបាល នៃគណៈអភិបាលរាជធានី- ខេត្ត ជាមួយនឹងសមត្ថកិច្ចពាក់ព័ន្ធទាំងអស់ត្រូវបន្តរឹតបណ្តឹង និង​ចាត់វិធានការណ៍​ឲ្យបាន​ម៉ឺងម៉ាត់​បំផុត​ ចំពោះក្រុមក្មេងទំនើង ពិសេសក្រុមដាវសាំម៉ូរ៉ៃឲ្យខាងតែបាន ដោយគ្មានការលើកលែងនោះឡើយ ដើម្បីការពារសន្តិសុនសណ្តាប់សាធារណៈ និងសន្តិសុខសង្គមជាតិ។

សម្តេចធិបតី បានលើកឡើងទៀតថា ការធ្វើបែបនេះ ដើម្បីធានាសុខសុវត្ថិភាពដល់បងប្អូន​ប្រជាពលរដ្ឋ​ក៏ដូចជាភ្ញៀវទេសចរជាតិ និងអន្តរជាតិ ហើយក៏ដើម្បីធានាដល់សន្តិសុខសង្គមតាមភូមិ ឃុំ និងសង្កាត់ឲ្យកាន់តែមានសុវត្ថិភាពផងដែរ។

សម្តេចធិបតីនាយករដ្ឋមន្ត្រី ក៏បានស្នើឲ្យស្ថាប័ន​អយ្យការត្រូវមានវិធានការ ការអនុវត្តច្បាប់​ឲ្យបាន​ម៉ឺងម៉ាត់ ក្នុងការចាត់ការមើលក្នុងសំណុំរឿងក្មេងទំនើងនេះ ប្រកបដោយយកចិត្តទុកដាក់ខ្ពស់ ដើម្បីលើកកម្ពស់ប្រសិទ្ធិភាព ក្នុងការអនុវត្តច្បាប់របស់កម្ពុជាផងដែរ ។

ទន្ទឹមនឹងនេះសម្តេចនាយករដ្ឋមន្ត្រី ក៏បានអំពាវនាវដល់ឪពុកម្តាយក៏ដូចជាអាណាព្យាបាល ខិតខំ​អប់រំ​ទូន្មាន​ប្រដៅកូនចៅរបស់ខ្លួន ព្រោះថា​ កិច្ចការងារនេះ ត្រូវអប់រំទាំងនៅសាលារៀន និងនៅផ្ទះជាប្រចាំ៕ អត្ថបទបាន ចក់