គណបក្សប្រជាធិបតេយ្យ ដែលជាបក្សប្រឆាំងដ៏សំខាន់របស់ប្រទេសកូរ៉េខាងត្បូង បានជំរុញឱ្យប្រធានាធិបតីស្តីទី លោក Han Duck-soo អនុម័តសេចក្ដីស្នើច្បាប់រដ្ឋអាជ្ញាពិសេស ដើម្បីស៊ើបអង្កេតការចោទប្រកាន់ពីបទបះបោរប្រឆាំងនឹងលោកប្រធានាធិបតី Yoon Suk Yeol និងការចោទប្រកាន់ជាច្រើនប្រឆាំងនឹងស្ត្រីទីមួយ លោកស្រី Kim Keon Hee។

បក្សនេះបានដាក់ថ្ងៃផុតកំណត់នៅថ្ងៃអង្គារ (២៤ ធ្នូ) ស្អែកនេះ ដោយព្រមានថា ខ្លួននឹងបន្តដំណើរការនីតិវិធីចោទប្រកាន់ទម្លាក់តំណែងលើនាយករដ្ឋមន្ត្រីដែលកំពុងបំពេញតួនាទីជាប្រធានាធិបតីស្ដីទីរូបនេះ ប្រសិនបើលោកមិនយល់ព្រមតាមសំណើ។

ប្រធានក្រុមសមាជិកសភារបស់បក្សប្រជាធិបតេយ្យកូរ៉េ លោក Park Chan-dae កាលពីថ្ងៃអាទិត្យ (២២ ធ្នូ) បានព្រមានថា "ប្រសិនបើលោកប្រធានាធិបតីស្តីទី Han មិនប្រកាសអនុម័តសំណើច្បាប់រដ្ឋអាជ្ញាពិសេសនេះត្រឹមថ្ងៃទី២៤ ធ្នូទេ យើងនឹងចាត់ទុកលោកជាអ្នកទទួលខុសត្រូវភ្លាមៗ ដោយការធ្វើការចោទប្រកាន់ទម្លាក់តំណែង"។

គួរបញ្ជាក់ថា សេចក្ដីស្នើច្បាប់ ដែលតម្រូវឱ្យមានការស៊ើបអង្កេតរបស់រដ្ឋអាជ្ញាពិសេសលើលោក Yoon និងការសង្ស័យទាំងអស់ទាក់ទងនឹងការប្រកាសច្បាប់អាជ្ញាសឹក ព្រមទាំងការចោទប្រកាន់ពាក់ព័ន្ធនឹងស្ត្រីទីមួយនោះ បានឆ្លងរដ្ឋសភាដែលដឹកនាំដោយបក្សប្រឆាំងនៅថ្ងៃទី១២ ខែធ្នូ។ ប្រធានាធិបតីស្តីទី ត្រូវតែប្រកាសឱ្យប្រើ ឬវេតូច្បាប់នេះត្រឹមថ្ងៃទី០១ ខែមករា ឆ្នាំ២០២៥៕