នៅថ្ងៃចន្ទនេះ វិមានក្រឹមឡាំង បានច្រានចោលសេចក្តីរាយការណ៍របស់សារព័ត៌មានទួរគីដែលបានលើកឡើងថា លោកស្រី Asma al-Assad ដែលជាភរិយាកើតនៅអង់គ្លេសរបស់អតីតប្រធានាធិបតីស៊ីរីលោក Bashar al-Assad ចង់លែងលះគ្នា និងចាកចេញពីប្រទេសរុស្ស៊ី ។

 អ្នកនាំពាក្យវិមានក្រឹមឡាំងលោក Dmitry Peskov បានធ្វើការច្រានចោលផងដែរចំពោះសេចក្តីរាយការណ៍របស់សារព័ត៌មានទួរគីដែលបានលើកឡើងថា លោក Assad ត្រូវបានបង្ខាំងនៅក្នុងទីក្រុងម៉ូស្គូ ហើយទ្រព្យសកម្មរបស់លោកត្រូវបានបង្កក ។

 នៅពេលសួរតាមទូរស័ព្ទថាតើសេចក្តីរាយការណ៍នេះ ត្រូវគ្នានឹងការពិតដែរឬទេ លោក Peskov និយាយថា អត់ទេ វាពុំត្រូវនឹងការពិតនោះទេ ។

 សារព័ត៌មានទួរគី និងអារ៉ាប់ បានរាយការណ៍កាលពីថ្ងៃអាទិត្យថា លោកស្រី Asma al-Assad បានដាក់ពាក្យលែងលះគ្នានៅក្នុងប្រទេសរុស្ស៊ី ជាទីដែលគ្រួសារលោក Assad ត្រូវបានគេផ្តល់សិទ្ធិជ្រកកោនក្នុងខែនេះ ក្រោយក្រុមឧទ្ទាមដណ្តើមគ្រប់គ្រងទីក្រុងដាម៉ាស់ បន្ទាប់ពីការរុលចូលលឿនដូចផ្លេកបន្ទោររបស់ពួកគេ ៕