គណៈរដ្ឋមន្ត្រីរបស់កោះតៃវ៉ាន់ នៅថ្ងៃចន្ទ (ទី២៣ ខែធ្នូ) នេះ បានព្រមានថា សន្តិសុខរបស់កោះនេះ អាចប្រឈមនឹងហានិភ័យ បន្ទាប់ពីគណបក្សប្រឆាំងបានអនុម័តច្បាប់ដែលនឹងតម្រូវឲ្យកាត់បន្ថយការចំណាយរបស់រដ្ឋបាលគ្រប់គ្រង ក្នុងនោះរួមទាំងវិស័យការពារផងដែរ នៅពេលដែលប្រទេសចិន បានបង្កើនសកម្មភាពយោធា នៅក្បែរៗកោះនោះ។

គណបក្សប្រឆាំងរបស់កោះតៃវ៉ាន់ ដែលក្ដោបក្ដាប់សំឡេងភាគច្រើន នៅក្នុងសភា កាលពីសប្តាហ៍មុន បានអនុម័តច្បាប់ ដើម្បីកែប្រែការចំណាយពីរដ្ឋបាលកណ្តាលទៅរដ្ឋបាលតំបន់ ជាចំណាត់ការមួយដែលត្រូវបានជំទាស់យ៉ាងខ្លាំងក្លាពីសំណាក់គណបក្សប្រជាធិបតេយ្យជឿនលឿន (DPP) ដែលកំពុងកាន់អំណាច និងបាតុកររាប់ពាន់នាក់។

នៅឯសន្និសីទសារព័ត៌មាន នាថ្ងៃចន្ទនេះ មន្ត្រីគ្រប់គ្រងខាងហិរញ្ញវត្ថុ លោកស្រី Chuang Tsui-yun បាននិយាយថា ច្បាប់នេះនឹង «ធ្វើឲ្យហិរញ្ញវត្ថុរបស់រដ្ឋបាលកណ្តាលចុះខ្សោយយ៉ាងខ្លាំង» ដោយលោកស្រីបានបន្ថែមថា រដ្ឋបាលប្រហែលជាត្រូវបង្កើនការផ្តល់ហិរញ្ញប្បទានបំណុល។

អគ្គនាយកដ្ឋានថវិកា គណនេយ្យ និងស្ថិតិ បានឲ្យដឹងថា ដើម្បីបំពេញតាមតម្រូវការថវិកាថ្មី រដ្ឋបាលកណ្តាល នឹងត្រូវកាត់បន្ថយ ២៨ភាគរយពីផ្នែកសំខាន់នៃសំណើថវិការបស់ខ្លួន សម្រាប់ឆ្នាំក្រោយ ដែលរាប់បញ្ចូលទាំងទឹកប្រាក់ ២៩៤,៥ពាន់លានដុល្លារតៃវ៉ាន់ (ជាង ៩.០០០លានដុល្លារអាមេរិក) នៃថវិកាក្នុងវិស័យការពារទាំងមូល។

តាមរយៈការបង្ហោះ នៅលើបណ្ដាញសង្គម Facebook កាលពីចុងសប្តាហ៍កន្លងមក មេដឹកនាំកោះតៃវ៉ាន់ លោក Lai Ching-te បានលើកឡើងថា ច្បាប់នេះ អាច «កាត់បន្ថយយ៉ាងធ្ងន់ធ្ងរនូវកញ្ចប់ថវិកាក្នុងវិស័យការពារ» ដោយលោកបន្ថែមថា សមត្ថភាពប្រយុទ្ធរបស់កោះតៃវ៉ាន់អាចនឹងរងផលប៉ះពាល់យ៉ាងខ្លាំងក្លា។ លោក Lai បានសង្កត់ធ្ងន់ថា «អ្វីដែលជាគ្រោះថ្នាក់នោះ គឺសន្តិសុខជាតិ និងសុវត្ថិភាពរបស់អ្នកស្រុកកោះតៃវ៉ាន់ ២៣លាននាក់»៕