ប្រធានាធិបតីអ៊ុយក្រែន លោក Volodymyr Zelenskiy កាលពីថ្ងៃចន្ទ ទី២៣ ខែធ្នូ បានរិះគន់នូវអ្វីដែលលោកហៅថា គ្មានឆន្ទះពិតប្រាកដរបស់លោក Robert Fico នាយករដ្ឋមន្ត្រីប្រទេសស្លូវ៉ាគី ដើម្បីបញ្ចប់ការពឹងផ្អែករបស់ប្រទេសលោក លើធនធានធម្មជាតិរបស់រុស្ស៊ីថា ជា «បញ្ហាសន្តិសុខដ៏ធំ» សម្រាប់អឺរ៉ុប និងប្រទេសស្លូវ៉ាគី។

លោក Zelenskiy បានធ្វើការអត្ថាធិប្បាយបែបនេះ បន្ទាប់ពី លោក Fico បានជួបជាមួយប្រធានាធិបតីរុស្ស៊ី លោក Vladimir Putin នៅទីក្រុងមូស្គូ កាលពីថ្ងៃអាទិត្យ ទី២២ ខែ ធ្នូ។

លោក Fico បាននិយាយថា ជំនួបនេះ គឺដើម្បីឆ្លើយតបទៅនឹងការពិភាក្សាជាមួយ លោក Zelenskiy ដែលលោកបានចោទប្រកាន់ពីការប្រឆាំងទៅនឹងការបញ្ជូនឧស្ម័នឆ្លងកាត់ប្រទេសអ៊ុយក្រែន ទៅកាន់ប្រទេសរបស់លោក។

អ៊ុយក្រែន បាននិយាយដដែលៗថា ខ្លួននឹងមិនបន្តកិច្ចព្រមព្រៀងបញ្ជូនឧស្ម័នពីប្រទេសរុស្ស៊ីទៅកាន់អឺរ៉ុប ដែលនឹងផុតកំណត់នៅថ្ងៃទី១ ខែមករា នោះទេ។ ការទូទាត់ប្រាក់សម្រាប់ឧស្ម័ន បានជួយរុស្ស៊ីឱ្យធ្វើសង្រ្គាមរយៈពេលជិតបីឆ្នាំរបស់ខ្លួន នៅក្នុងប្រទេសអ៊ុយក្រែន។

លំហូរឧស្ម័នតាមរយៈប្រទេសអ៊ុយក្រែន មានចំនួនប្រហែលពាក់កណ្តាលនៃការនាំចេញឧស្ម័នតាមបំពង់បង្ហូរប្រេងសរុបរបស់រុស្ស៊ីទៅកាន់សហភាពអឺរ៉ុប។

ប្រទេសស្លូវ៉ាគី អ៊ីតាលី អូទ្រីស និងសាធារណៈរដ្ឋឆែក នឹងរងផលប៉ះពាល់ខ្លាំងបំផុតប្រសិនបើកិច្ចសន្យានេះត្រូវបញ្ចប់។

លោក Fico និយាយកាលពីថ្ងៃអាទិត្យថា លោកពូទីន បានបញ្ជាក់ពីឆន្ទៈរបស់រុស្ស៊ីក្នុងការបន្តផ្គត់ផ្គង់ឧស្ម័នដល់ប្រទេសស្លូវ៉ាគី។