អ្នកស្រុកនៅតំបន់មួយរបស់អូស្ត្រាលី ដែលឆាបឆេះដោយចំហេះព្រៃ ត្រូវបានអាជ្ញាធរផ្តល់ពេលពីរម៉ោងឱ្យត្រឡប់ទៅលំនៅឋានវិញដើម្បីប្រមូលរបស់របររបស់ពួកគេមុនបុណ្យណូអែលនៅថ្ងៃអង្គារ (២៤ ធ្នូ) នេះ ខណៈក្រុមសង្គ្រោះព្យាយាមពន្លត់អណ្ដាភ្លើងដែលកំពុងរីករាលដាល។

សហគមន៍ជុំវិញតំបន់ ហ្រ្គាមភៀន (Grampians) ក្នុងរដ្ឋ វីកតូរៀ (Victoria) ត្រូវបង្ខំចិត្តជម្លៀសចេញ ស្របពេលមានការព្រមានពីអាជ្ញាធរថា ស្ថានភាពនៅទីនោះនៅប៉ុន្មានថ្ងៃខាងមុខអាចអាក្រក់បំផុតចាប់តាំងពីរដូវចំហេះធ្ងន់ធ្ងរបំផុតរបស់ប្រទេសអូស្ត្រាលីក្នុងកំណត់ត្រា ឬហៅថា "រដូវក្តៅពណ៌ខ្មៅ" នៃឆ្នាំ២០១៩-២០២០។

ចំហេះព្រៃបានឆាបឆេះផ្ទៃដីជាង ៤១.០០០ ហិកតា កាលពីសប្តាហ៍មុន ប៉ុន្តែមិនមានអ្នកស្លាប់ ឬខូចខាតទ្រព្យសម្បត្តិធ្ងន់ធ្ងរទេ។ ការព្យាករនៃកម្ដៅខ្លាំងដ៏ខ្លាំងក្លាខ្ទង់ ៤០អង្សាសេ ក៏បានជំរុញឱ្យមានការព្រមានអំពីចំហេះនៅទូទាំងប្រទេសផងដែរ។

ផ្នែកជាច្រើននៃប្រទេសអូស្ត្រាលី ស្ថិតក្នុងការប្រុងប្រយ័ត្នខ្ពស់ចំពោះគ្រោះចំហេះនៅរដូវក្ដៅនេះ បន្ទាប់ពីរដូវស្ងប់ស្ងាត់ជាច្រើនឆ្នាំ បើធៀបនឹងចំហេះឆ្នាំ២០១៩-២០ ដែលត្រូវបានផ្សារភ្ជាប់ទៅនឹងការស្លាប់រាប់រយនាក់ និងបានលេបត្របាក់លើផ្ទៃដី ២៤លានហិកតា៕