លោក Tom Fletcher អគ្គលេខាធិការរងអង្គការសហប្រជាជាតិទទួលបន្ទុកកិច្ចការមនុស្សធម៌ និងជាអ្នកសម្របសម្រួលជំនួយសង្គ្រោះបន្ទាន់ កាលពីថ្ងៃចន្ទ បាននិយាយក្នុងសេចក្តីថ្លែងការណ៍មួយ ដែលបានចេញបន្ទាប់ពីដំណើរទស្សនកិច្ចរបស់លោក ទៅកាន់ប្រទេសស៊ីរី និងដែនដីប៉ាឡេស្ទីនដែលគ្រប់គ្រងដោយអ៊ីស្រាអែលថា អំពើហិង្សាដែលកំពុងបន្តកើតមាន បានធ្វើឲ្យជនស៊ីវិលនៅតំបន់ហ្កាហ្សា គ្មានកន្លែងសុវត្ថិភាព ដើម្បីរស់នៅទេ។

លោក Fletcher បានកត់សម្គាល់ឃើញថា រយៈពេលតិចជាងមួយឆ្នាំ បន្ទាប់ពីតុលាការយុត្តិធម៌អន្តរជាតិបានចេញដីកាបណ្តោះអាសន្នដំបូងរបស់ខ្លួនលើការអនុវត្តអនុសញ្ញាប្រល័យពូជសាសន៍ នៅតំបន់ហ្កា ហ្សា ភាពរឹងមាំនៃអំពើហិង្សាដែលនៅបន្ត គឺមានន័យថា គ្មានកន្លែងណាមានសុវត្ថិភាពសម្រាប់ជនស៊ីវិល នៅក្នុងតំបន់ហ្កាហ្សាស្ទ្រីបទេ។

លោក Fletcher បានពណ៌នាអំពីវិបត្តិមនុស្សធម៌ដ៏ធ្ងន់ធ្ងរ នៅក្នុងតំបន់ហ្កាហ្សា ដែលការវាយប្រហារតាមអាកាសទៅលើតំបន់ដែលមានប្រជាជនរស់នៅច្រើន រួមទាំងតំបន់ដែលត្រូវបានរៀបចំ ដោយកងកម្លាំង អ៊ីស្រាអែល ជាកន្លែងផ្លាស់ប្តូរទីលំនៅ បានបណ្តាលឲ្យមានការបំផ្លិចបំផ្លាញ ការផ្លាស់ទីលំនៅ និងការបាត់បង់ជីវិតយ៉ាងទូលំទូលាយ។ លោកក៏បានរាយការណ៍ផងដែរអំពីការដួលរលំនៃច្បាប់ និងសណ្តាប់ធ្នាប់ នៅក្នុងតំបន់ហ្កាហ្សា ជាមួយនឹងក្រុមជនអន្ធពាលប្រដាប់អាវុធ បានលួចសម្ភារៈមនុស្សធម៌ជាប្រព័ន្ធ ដែលរារាំងដល់កិច្ចខិតខំប្រឹងប្រែងសង្គ្រោះបន្ថែមទៀត។

ទោះបីជាមានតម្រូវការមនុស្សធម៌ដ៏ច្រើនលើសលប់ក៏ដោយ លោក Fletcher បានបង្ហាញថា អាជ្ញាធរអ៊ីស្រាអែល បានបដិសេធជាប្រចាំនូវការទទួលបានជំនួយរបស់អង្គការសហប្រជាជាតិ ដោយបានបដិសេធសំណើជាង ១០០ ក្នុងការចូលទៅកាន់តំបន់ហ្កាហ្សាភាគខាងជើង ចាប់តាំងពីថ្ងៃទី 0៦ ខែតុលា ឆ្នាំ២០២៤។ ការបិទខ្ទប់នេះ បានធ្វើឲ្យភាគខាងជើងតំបន់ហ្សា ស្ថិតនៅក្រោមការឡោមព័ទ្ធជិតពីរខែ ការភ័យខ្លាចនៃទុរ្ភិក្ស កាន់តែកើនឡើង។ ទន្ទឹមនឹងនេះ ប្រជាជនដ៏ច្រើនកកកុញ នៅភាគខាងត្បូងតំបន់ហ្កាហ្សា បានបង្កើតឲ្យមានជីវភាពរស់ដ៏លំបាក ដែលបន្តកាន់តែយ៉ាប់យ៉ឺន ខណៈដែលរដូវរងាធ្វើឲ្យតម្រូវការមនុស្សធម៌ កាន់តែធ្ងន់ធ្ងរឡើង។