មនុស្សជាច្រើនបានធ្វើបាតុកម្មនៅខាងក្រៅហាងកាហ្វេ Starbucks នៅតំបន់ Manhattan របស់សហរដ្ឋអាមេរិក កាលពីថ្ងៃអង្គារ (២៤ ធ្នូ) នៅមុនថ្ងៃបុណ្យណូអែល ទាមទារលក្ខខណ្ឌការងារល្អជាងមុន ហើយសហជីពកម្មករនិយាយថា ការតវ៉ាបែបនេះកំពុងពង្រីកទៅដល់ហាងជាង ៣០០កន្លែង ទូទាំងទីក្រុងញូវយ៉ក និងលើសពីនេះ ដោយបុគ្គលិកជាង ៥.០០០នាក់ នឹងចូលរួមកូដកម្ម មុនការឈប់ធ្វើការរយៈពេល ៥ថ្ងៃ ដែលនឹងបញ្ចប់នៅល្ងាចបុណ្យណូអែលក្នុងថ្ងៃពុធ (២៥ ធ្នូ) នេះ។

ក្រុមហ៊ុន Starbucks ដែលប្រតិបត្តិការហាងជាង ១០.០០០កន្លែង ទូទាំងសហរដ្ឋអាមេរិក និយាយថា ៩៨% នៃហាងរបស់ខ្លួននៅតែបើកដដែល ដោយមានហាងប្រហែល ១៧០ទីតាំង បានបិទកាលពីថ្ងៃអង្គារ។ សហជីពកម្មករបានអះអាងថា ហាងជាង ២៩០កន្លែង ត្រូវបាន "បិទទាំងស្រុង" ហើយហាងជាង ៣០០ កំពុងធ្វើកូដកម្ម ដូចដែលបានគ្រោងទុកនៅទូទាំង ៤៥រដ្ឋរបស់អាមេរិក។

បាតុករនិយាយថា បុគ្គលិក Starbucks "ទទួលបានការដំឡើងប្រាក់ឈ្នួល ២%ប៉ុណ្ណោះនៅឆ្នាំនេះ ប្រហែលជា ៣៥សេនក្នុងមួយម៉ោង ដែលស្ទើរតែមិនគ្រប់ដើម្បីទិញកាហ្វេ Starbucks មួយកែវផងក្នុងមួយសប្តាហ៍"។

សហជីព ដែលតំណាងឱ្យនិយោជិតនៅហាងចំនួន ៥២៥កន្លែងទូទាំងប្រទេស បានអំពាវនាវឱ្យធ្វើកូដកម្មនៅទូទាំងទីក្រុងធំៗចំនួន១២ រួមទាំងទីក្រុង ញូវយ៉ក (New York) ឡូសអេនជើឡេស (Los Angeles) បូស្តុន (Boston) និងទីក្រុង ស៊ីអាថល (Seattle) ជុំវិញបញ្ហាប្រាក់ឈ្នួល ចំនួនបុគ្គលិក និងកាលវិភាគការងារដ៏មមាញឹក៕