ប្រធានាធិបតីជាប់ឆ្នោតរបស់សហរដ្ឋអាមេរិក លោក Donald Trump បាននិយាយកាលពីថ្ងៃអង្គារ ទី ២៥ ខែធ្នូ ថា លោកនឹងដឹកនាំក្រសួងយុត្តិធម៌របស់លោកឱ្យ «បន្តអនុវត្ត» យ៉ាងខ្លាំងក្លានូវទោសប្រហារជីវិត ដើម្បីការពារប្រជាជនអាមេរិកពី «អ្នកចាប់រំលោភដោយហិង្សា ឃាតករ និងមនុស្សអាក្រក់» នៅពេលដែលលោកឡើងកាន់តំណែង នៅថ្ងៃទី២០ ខែមករា ខាងមុខ។

សេចក្តីថ្លែងការណ៍របស់លោក Trump នៅលើវេទិកាបណ្តាញផ្សព្វផ្សាយសង្គម Truth Social គឺឆ្លើយតបទៅនឹងការប្រកាសរបស់ប្រធានាធិបតី លោក Joe Biden កាលពីថ្ងៃច័ន្ទថា លោកបានបន្ធូរបន្ថយទោសដល់អ្នកទោសសហព័ន្ធចំនួន៣៧នាក់ ក្នុងចំណោម ៤០ នាក់ ក្នុងជួរទោសប្រហារជីវិត ដោយបង្វែរពួកគេទៅជាទោសជាប់ពន្ធនាគារអស់មួយជីវិត។

លោក Trump បាននិយាយថា នៅពេលលោកឡើងកាន់តំណែងភ្លាមៗ លោកនឹងដឹកនាំក្រសួងយុត្តិធម៌ ឱ្យបន្តការកាត់ទោសប្រហារជីវិត ដើម្បីការពារគ្រួសារ និងកុមារអាមេរិក ពីអ្នកចាប់រំលោភ ឃាតករ និងមនុស្សអាក្រក់។

លោក Trump បានចាប់ផ្តើមឡើងវិញទោសប្រហារជីវិតសហព័ន្ធ ក្នុងអំឡុងពេលអាណត្តិដំបូងរបស់លោក នៅក្នុងតំណែងពីឆ្នាំ២០១៧ ដល់ឆ្នាំ២០២១ បន្ទាប់ពីផ្អាកជិត២០ឆ្នាំ។

ក្រុមអន្តរកាលរបស់លោក Trump កាលពីថ្ងៃចន្ទបានរិះគន់ការសម្រេចចិត្តរបស់លោក Biden ដោយហៅថាវាជារឿងគួរឱ្យស្អប់ខ្ពើម និងគាំទ្រទណ្ឌិត ជាអ្នកដែលស្ថិតក្នុងចំណោមឃាតករដ៏អាក្រក់បំផុតក្នុងពិភពលោក។