មហាសន្និបាតអង្គការសហប្រជាជាតិ កាលពីថ្ងៃអង្គារ បានអនុម័តអនុសញ្ញាអង្គការសហប្រជាជាតិប្រឆាំងឧក្រិដ្ឋកម្មតាមអ៊ីនធឺណិត ជាសន្ធិសញ្ញាពិភពលោកដ៏សំខាន់មួយក្នុងការជំរុញកិច្ចសហប្រតិបត្តិការអន្តរជាតិក្នុងការប្រយុទ្ធប្រឆាំងឧក្រិដ្ឋកម្មបែបនេះ។ វាជាសន្ធិសញ្ញាយុត្តិធម៌ឧក្រិដ្ឋកម្មអន្តរជាតិដំបូង ដែលត្រូវបានចរចាក្នុងចំណោមប្រទេសជាសមាជិករបស់អង្គការសហប្រជាជាតិ រយៈពេលជាង ២០ ឆ្នាំមកនេះ។

អនុសញ្ញាដែលជាចំណងផ្លូវច្បាប់ ទទួលស្គាល់ហានិភ័យសំខាន់ៗបង្កឡើងដោយការប្រើប្រាស់មិនត្រឹមត្រូវនៃបច្ចេកវិទ្យាព័ត៌មាន និងទំនាក់ទំនង ដែលផ្តល់ឱកាសឱ្យមានសកម្មភាពឧក្រិដ្ឋកម្មនានា ពុំធ្លាប់មានពីមុនមក។

វាបង្ហាញពីផលប៉ះពាល់អវិជ្ជមាន ដែលឧក្រិដ្ឋកម្មបែបនេះ អាចមានទៅលើរដ្ឋ សហគ្រាស និងសុខុមាលភាពរបស់បុគ្គល និងសង្គម ហើយផ្តោតសំខាន់លើការការពារពួកគេពីបទល្មើសដូចជា ភេរវកម្ម ការជួញដូរមនុស្ស ការរត់ពន្ធគ្រឿងញៀន និងឧក្រិដ្ឋកម្មហិរញ្ញវត្ថុតាមអ៊ីនធឺណិត។

ឯកសារនេះ ក៏ទទួលស្គាល់ពីផលប៉ះពាល់កើនឡើងពីឧក្រិដ្ឋកម្មតាមអ៊ីនធឺណិតលើជនរងគ្រោះ និងផ្តល់អាទិភាពចំពោះយុត្តិធម៌ ជាពិសេសសម្រាប់ក្រុមងាយរងគ្រោះ។ វាក៏បញ្ជាក់អំពីតម្រូវការសម្រាប់ជំនួយបច្ចេកទេស ការកសាងសមត្ថភាព និងការសហការក្នុងចំណោមរដ្ឋ និងអ្នកពាក់ព័ន្ធដទៃទៀត។

យោងតាមសេចក្តីប្រកាសព័ត៌មានរបស់អង្គការសហប្រជាជាតិបានឲ្យដឹងថា អនុសញ្ញានេះ នឹងបើកឱ្យមានការចុះហត្ថលេខានៅក្នុងពិធីផ្លូវការមួយ ដែលទីក្រុងហាណូយប្រទេសវៀតណាម ធ្វើជាម្ចាស់ផ្ទះនៅឆ្នាំក្រោយ ហើយនឹងចូលជាធរមានក្នុងរយៈពេល៩០ថ្ងៃបន្ទាប់ពីការផ្តល់សច្ចាប័នដោយប្រទេសហត្ថលេខីទី៤០។

ដោយស្វាគមន៍ចំពោះការអនុម័តអនុសញ្ញាជាប្រវត្តិសាស្ត្រនេះ អគ្គលេខាធិការអង្គការសហប្រជាជាតិ លោក Antonio Guterres បានបង្ហាញជំនឿរបស់លោកថា សន្ធិសញ្ញាថ្មីនេះ នឹងធ្វើឲ្យប្រសើរសុវត្ថិភាពតាមអ៊ីនធឺណិត និងបានអំពាវនាវឱ្យរដ្ឋទាំងអស់ចូលរួម។