ក្រុមមន្ត្រីបាននិយាយថា មីស៊ីលបាលីស្ទិកមួយគ្រាប់ បានវាយប្រហារចំអគារផ្ទះល្វែងមួយខ្នង នៅទីក្រុង Kryvyi Rih ភាគកណ្ដាលប្រទេសអ៊ុយក្រែន កាលពីថ្ងៃអង្គារ (ទី២៤ ខែធ្នូ) ដោយបានសម្លាប់មនុស្សម្នាក់ និងបណ្ដាលឲ្យមានអ្នករបួស ១៥នាក់ ក្នុងនោះ ៤នាក់ ស្ថិតក្នុងស្ថានភាពធ្ងន់ធ្ងរ។

មន្ត្រីអ៊ុយក្រែន បានថ្កោលទោសការវាយប្រហារនៅមុនបុណ្យណូអែល លើទីក្រុង ដែលជាស្រុកកំណើតរបស់ប្រធានាធិបតី លោក Volodymyr Zelenskiy។ ប្រធានរដ្ឋបាលយោធារបស់ទីក្រុង លោក Oleksandr Vilkul បានសរសេរនៅលើកម្មវិធីផ្ញើសារ Telegram ថា៖ «បុគ្គលមានចិត្តឃោរឃៅ បានវាយប្រហារដោយផ្ទាល់លើប្លុកលំនៅឋាន ៤ជាន់ដែលមាន ៣២បន្ទប់»។

ចំណែកលោកអភិបាល Serhiy Lysak បាននិយាយថា បុរសម្នាក់ដែលរាងកាយរបស់គេត្រូវបានទាញចេញពីក្រោមគំនរបាក់បែក មិនអាចមានជីវិតឡើងវិញដោយសារការជួយពីក្រុមគ្រូពេទ្យបឋមសង្គ្រោះឡើយ។ រីឯលោក Vilkul បន្ទាប់មកបានប្រាប់បន្ថែមថា ស្ត្រីម្នាក់ត្រូវបានគេជួយសង្គ្រោះ និងបញ្ជូនទៅកាន់មន្ទីរពេទ្យ បន្ទាប់ពីនៅក្រោមគំនរបាក់បែករយៈពេល ៤ម៉ោង។

មន្ត្រីទទួលពាក្យបណ្ដឹងពលរដ្ឋផ្នែកសិទ្ធិមនុស្សរបស់អ៊ុយក្រែន លោក Dmytro Lubinets បានសរសេរនៅលើ Telegram ថា៖ «ខណៈពេលដែលប្រទេសផ្សេងទៀត នៅជុំវិញពិភពលោក កំពុងប្រារព្ធពិធីបុណ្យណូអែលយ៉ាងរីករាយ ប្រជាជនអ៊ុយក្រែនឯណេះវិញ កំពុងបន្តទទួលរងនូវការវាយប្រហារដោយរុស្ស៊ីឥតឈប់ឈរ»។

លោកអភិបាល Lysak បានបង្ហោះរូបថតអ្នកជួយសង្គ្រោះ កំពុងលូនតាមគំនរបាក់បែកដ៏ធំ ដោយទាញយកមនុស្សដែលគ្របដោយធូលី ហើយដាក់ពួកគេក្នុងរថយន្តសង្គ្រោះបន្ទាន់។ ទីក្រុង Kryvyi Rih គឺជាទីក្រុងផលិតដែក ដែលប្រជាជន នៅមុនសង្គ្រាម មានជាង ៦០០.០០០នាក់៕