ក្រុមសកម្មប្រយុទ្ធហាម៉ាសប៉ាឡេស្ទីន នៅថ្ងៃពុធ (ទី២៥ ខែធ្នូ) បានប្រាប់ឲ្យដឹងថា អ៊ីស្រាអែលបានកំណត់លក្ខខណ្ឌថ្មី ដែលនាំឲ្យមានការពន្យារពេលក្នុងការឈានដល់កិច្ចព្រមព្រៀងបទឈប់បាញ់ នៅតំបន់ហ្កាហ្សា។

តែយ៉ាងណាក្ដី ក្រុមហាម៉ាស បានលើកឡើងថា ខ្លួនកំពុងបង្ហាញពីភាពបត់បែន ហើយថា ការចរចាស្តីពីបទឈប់បាញ់ដែលសម្រុះសម្រួលដោយកាតា និងអេហ្ស៊ីបកំពុងតែឈានទៅរកទិសដៅប្រាកដប្រជា។

ក្រុមហាម៉ាស បានប្រាប់ថា៖ «ការកំណត់លក្ខខណ្ឌថ្មី ទាក់ទងនឹងការដកទ័ព បទឈប់បាញ់ អ្នកទោស និងការវិលត្រឡប់មកវិញរបស់ជនភៀសខ្លួន បានពន្យារពេលក្នុងការឈានដល់កិច្ចព្រមព្រៀង»។

ចំណែកការិយាល័យរបស់នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយកាលពីថ្ងៃអង្គារថា ក្រុមចរចាអ៊ីស្រាអែលមួយក្រុម បានវិលត្រឡប់មកកាន់ប្រទេសអ៊ីស្រាអែលពីប្រទេសកាតាវិញ កាលពីល្ងាចថ្ងៃអង្គារ ដើម្បី «ពិគ្រោះយោបល់ផ្ទៃក្នុង» ទាក់ទងនឹងកិច្ចព្រមព្រៀងចំណាប់ថ្នូរ បន្ទាប់ពីមានកិច្ចពិភាក្សាដ៏សំខាន់មួយ ស្ដីអំពីតំបន់ហ្កាហ្សា៕