ការតវ៉ាពោរពេញដោយកំហឹង បានផ្ទុះឡើង កាលពីថ្ងៃពុធ (ទី២៥ ខែធ្នូ) នៅក្នុងប្រទេសស៊ីរី ពាក់ព័ន្ធទៅនឹងរូបភាពវីដេអូដែលបង្ហាញពីការវាយប្រហារលើទីសក្ការបូជារបស់ជនជាតិភាគតិច Alawite ដោយអ្នកឃ្លាំមើលសង្គ្រាម និយាយថា មានបាតុករម្នាក់ស្លាប់ នៅក្នុងទីក្រុង Homs។

ក្នុងហេតុការណ៍ដែលមិនទាក់ទងគ្នា នៅខេត្ត Tartus ដែលជាទីតាំងដ៏សំខាន់នៃជនជាតិភាគតិច Alawite របស់មេដឹកនាំ លោក Bashar al-Assad ដែលត្រូវបានទម្លាក់ពីអំណាច អង្គការឃ្លាំមើលសិទ្ធិមនុស្សស៊ីរីបានរាយការណ៍ពីការប៉ះទង្គិចគ្នាយ៉ាងខ្លាំងក្លាគួរឲ្យខ្លាច ដោយសារការប៉ុនប៉ងចាប់ខ្លួនអតីតមន្ត្រីម្នាក់។

ជាមួយគ្នានេះ ក្រុមសង្កេតការណ៍បានប្រាប់ថា បុគ្គលិកសន្តិសុខ ៦នាក់នៃអាជ្ញាធរថ្មីរបស់ប្រទេសស៊ីរី និងបុរសប្រដាប់អាវុធ ៣នាក់ ត្រូវបានសម្លាប់ក្នុងការប៉ះទង្គិចគ្នា នៅខេត្ត Tartus នៅពេលដែលកងកម្លាំងស្វែងរកចាប់ខ្លួនមន្រ្តីសម័យលោក Assad ដែលមានទំនាក់ទំនងនឹងពន្ធនាគារ Saydnaya ដ៏ល្បីឈ្មោះ។

នៅកណ្តាលទីក្រុង Homs ជាកន្លែងដែលបាតុករ បាននាំគ្នាតវ៉ានៅតាមដងផ្លូវ ជុំវិញរូបភាពវីដេអូវាយប្រហារទីសក្ការៈនោះ ក្រុមអ្នកសង្កេតការណ៍ដែលមានមូលដ្ឋាននៅចក្រភពអង់គ្លេស បានឲ្យដឹងថា បាតុករម្នាក់បានបាត់បង់ជីវិត និង ៥នាក់ផ្សេងទៀតបានរងរបួស «បន្ទាប់ពីកងកម្លាំងសន្តិសុខ បានបើកការបាញ់ប្រហារ ដើម្បីបំបែកហ្វូងមនុស្ស»។

ការតវ៉ានេះ គឺធំបំផុតរបស់ក្រុមជនជាតិភាគតិច Alawite ចាប់តាំងពីការដួលរលំរបបរបស់លោក Assad នៅដើមខែនេះ ហើយកើតឡើងមួយថ្ងៃបន្ទាប់ពីប្រជាជនស៊ីរីរាប់រយនាក់ បានតវ៉ានៅក្នុងរដ្ឋធានីដាម៉ាស ប្រឆាំងនឹងការដុតដើមឈើណូអែល។

អាជ្ញាធរអន្តរកាលដែលត្រូវបានតែងតាំងដោយក្រុមឥស្លាម Hayat Tahrir al-Sham (HTS) ដែលដឹកនាំការវាយលុក រហូតបានផ្តួលរំលំលោក Assad បានឲ្យដឹងនៅក្នុងសេចក្តីថ្លែងការណ៍ថា រូបភាពនៃការវាយប្រហារទីសក្ការៈនេះ មិនមែនកើតមានឡើង នាពេលថ្មីៗនេះនោះទេ៕