ប្រទេសចិនបានដកសមាជិកសភាយោធា ២នាក់ភ្លាមៗពីសភា ដោយគ្មានការពន្យល់ ខណៈដែលការបោសសម្អាតបុគ្គលសំខាន់ៗ ក្នុងកម្រិតខ្ពស់ៗនៃស្ថាប័នវិស័យការពារជាតិ បង្ហាញថា មិនមានសញ្ញានៃការបន្ធូរបន្ថយនោះឡើយ។

យោងតាមរបាយការណ៍ពីគណៈកម្មាធិការអចិន្ត្រៃយ៍សភាប្រជាជនចិន បានឲ្យដឹងថា ស្ថាប័ននីតិប្បញ្ញត្តិកំពូលរបស់ប្រទេសនេះ បានដកហូតសមាជិកភាពរបស់លោក You Haitao និងឧត្តមនាវីឯក លោក Li Pengcheng ក្នុងអំឡុងពេលកិច្ចប្រជុំមួយ កាលពីថ្ងៃពុធ (ទី២៥ ខែធ្នូ)។ លោក You ធ្លាប់ជាមេបញ្ជាការរងនៃកងទ័ពរំដោះប្រជាជន (PLA) ផ្នែក Ground Force (ទ័ពជើងគោក)។

ចំណែកលោកឧត្តមនាវីឯក Li គឺជាមេបញ្ជាការកងទ័ពជើងទឹកនៃបញ្ជាការភាគខាងត្បូង ដែលមើលការខុសត្រូវលើតំបន់សមុទ្រចិនខាងត្បូង ដែលមានភាពតានតឹងដោយសារជម្លោះដែនដី។ អ្នកស្នងតំណែងមុនរបស់លោកអនុឧត្តមនាវីឯក Li គឺលោកឧត្តមនាវីឯក Ju Xinchun ត្រូវបានដកចេញពីសភា កាលពីមួយឆ្នាំមុន។

ពាក់ព័ន្ធនឹងការបញ្ជាប់តួនាទីនេះ ស្ថាប័ននីតិប្បញ្ញត្តិ បានត្រឹមតែនិយាយថា លោក You និងលោកអនុឧត្តមនាវីឯក Li ត្រូវបានគេសង្ស័យថា បានបំពានច្បាប់ និងវិន័យ ជាទូទៅ គឺជារបៀបដែលបក្សកុម្មុយនីស្តចិនសំដៅទៅលើអំពើពុករលួយ។

ការដកចេញនូវមន្ត្រីទាំងនេះ គឺជាសញ្ញាចុងក្រោយបង្អស់ ដែលបង្ហាញថា យុទ្ធនាការប្រឆាំងអំពើពុករលួយ បានរីករាលដាលក្នុងជួរយោធា ចាប់តាំងពីឆ្នាំ២០២៣ មក។ កាលពីខែវិច្ឆិកា ប្រទេសចិនបានព្យួរតំណែងមន្ត្រីជាន់ខ្ពស់មួយរូប នៅក្នុងគណៈកម្មាការយោធាកណ្តាល ដែលជាស្ថាប័នយោធាកំពូលរបស់ប្រទេសដឹកនាំដោយប្រធានាធិបតីចិន លោក ស៊ី ជិនពីង (Xi Jinping)៕